வீட்டில் செல்வம் பெருகவும், அஷ்டலட்சுமியின் பரிபூரண அருள் கிடைக்கவும் நெல்லிக்காய் தீபம் ஏற்றும் முறை பற்றி ஜோதிடம்360 வழங்குகிறது ஒரு முழுமையான வழிகாட்டி.
நெல்லிக்காய் தீபம் மகிமைகள்
தினந்தோறும் வீட்டில் விளக்கேற்றி வழிபடுவது மகாலட்சுமியின் அருளைப் பெற்றுத் தரும் என்பது நாம் அறிந்ததே. ஒவ்வொரு தெய்வத்திற்கும் ஒவ்வொரு விதமாக விளக்கேற்றி வழிபடும் வழக்கம் உள்ளது. துர்கைக்கு எலுமிச்சம் பழ தீபம், பைரவர் மற்றும் விநாயகருக்கு தேங்காய் தீபம், அம்மனுக்கு மாவிளக்கு, முருகனுக்கு வெற்றிலை தீபம், வாழைப்பழத்தில் தீபம் என பலவிதமான தீபங்கள் உண்டு. இவற்றில் சக்தி வாய்ந்ததாக கருதப்படுவது கல் உப்பில் தீபம் ஏற்றி வழிபடுவதாகும். இதே போல் அதிக சக்தி வாய்ந்ததாகவும், வீட்டில் அஷ்டலட்சுமிகளின் அருள் எப்போதுமே நிறைந்திருக்கவும், இழந்த செல்வங்கள் அனைத்தையும் மீண்டும் பெறுவதற்கும், வீட்டில் எப்போதுமே குறைவு இல்லாமல் செல்வம் சேர்ந்து கொண்டே இருப்பதற்கும் நெல்லிக்காயில் தீபம் ஏற்றி வழிபடுவது மிக உயர்வான பலன்களை நமக்கு தரும். இந்த நெல்லிக்காய் தீபம் ஏற்றும் முறைகளை இங்கே காண்போம்.
நெல்லிக்காய் தீபம்: வழிபடும் முறை மற்றும் பலன்கள்
- சிறந்த நாட்கள்: வெள்ளிக்கிழமை மற்றும் பௌர்ணமி நாட்கள் அஷ்டலட்சுமியின் அருளைப் பெற உகந்தவை. வியாழக்கிழமைகளில் குபேரருக்கு நெல்லிக்காய் தீபம் ஏற்றி சகல செல்வங்களும் பெறலாம்.
- நெல்லிக்காய் தேர்வு: கருப்பு புள்ளிகள் இல்லாத பெரிய நெல்லிக்காய்களைத் தேர்ந்தெடுக்கவும்.
- தீபம் தயாரிப்பு: நெல்லிக்காயின் மேல் மற்றும் அடி பாகத்தை சமமாக நறுக்கி, காம்பு பகுதியில் கூர்மையான ஆயுதத்தால் மெதுவாக குழி போல உருவாக்கவும்.
- தீபம் ஏற்றுதல்: குழி செய்த நெல்லிக்காயில் நெய் அல்லது சுத்தமான நல்லெண்ணெய் ஊற்றி, மஞ்சளில் தோய்த்து நன்கு உலர வைத்த பஞ்சுத்திரியை இட்டு கிழக்கு திசையை நோக்கி தீபம் ஏற்றவும்.
- மந்திர உச்சாடனம்: தீபம் ஏற்றிய பிறகு, மகாலட்சுமி மந்திரங்கள் அல்லது ஸ்லோகங்களை உச்சரிக்கலாம். உச்சரிக்க முடியாவிட்டால், அவற்றை ஒலி வடிவமாக வீட்டில் ஒலிக்க விடலாம்.
- நைவேத்தியம்: அஷ்டலட்சுமிகளுக்கு நெய் ஊற்றிய சர்க்கரைப் பொங்கல் படைப்பது விசேஷமானது.
- பலன்கள்: இழந்த செல்வங்கள் யாவும் திரும்பக் கிடைக்கும். குபேர சம்பத்து மற்றும் வீட்டில் எப்போதுமே குறைவு இல்லாமல் செல்வம் சேரும்.