HbA1c அளவை இயற்கையாகக் குறைக்க டயட்டீஷியன் மன்ப்ரீத் பரிந்துரைக்கும் பானம்

HbA1c என்றால் என்ன? அதன் அளவுகள் எவ்வளவு இருக்க வேண்டும்?

HbA1c என்பது மூன்று மாதம் (கிட்டதட்ட 80-90) நாட்களில் ரத்தத்தில் உள்ள சர்க்கரையின் அளவைக் குறிக்கும் அளவாகும். ரத்தப் பரிசோதனை மூலம் இந்த அளவைக் கணக்கிட முடியும். நீரிழிவு நோயாளிகள் மருத்துவரைப் பார்க்கப் போகும் ஒவ்வொரு மூன்று மாதத்துக்கு ஒருமுறை இந்த பரிசோதனை தான் செய்ய அறிவுறுத்துவார்கள்.

• சர்க்கரை நோய் இல்லை: HbA1c அளவு 5.7 % சதவீதத்துக்கும் குறைவாக இருந்தால் அவர்களுக்கு நீரிழிவு நோய் இல்லை என்று அர்த்தம்.
• முன்நீரிழிவு நோய்: 5.7 % முதல் 6.4 % வரை இருந்தால் அவர்கள் முன்நீரிழிவு நோய் ஆபத்தில் இருக்கிறார்கள்.
• நீரிழிவு நோய்: 6.5 % சதவீதம் அல்லது அதற்கு மேல் இருந்தால் உங்களுக்கு நீரிழிவு நோய் இருக்கிறது என்று பொருள்.

இந்த HbA1c அளவு தான் ஒருவருக்கு நீரிழிவு நோய் இருக்கிறதா? இல்லையா? என்பதையே தீர்மானிக்கும்.

HbA1c அளவைக் குறைக்கும் டயபடீஸ் ரிவர்ஸ் டீ செய்முறை

அதிகமாக இருக்கும் HbA1c அளவைக் குறைப்பதற்கு டயட்டீஷியன் மன்ப்ரீத் பரிந்துரைக்கும் ஹெர்பல் பானம் அல்லது டயபடீஸ் ரிவர்ஸ் டீ செய்வது எப்படி என்று பார்ப்போம்.

தேவையான பொருள்கள்:

• வெந்தயம் - அரை ஸ்பூன்
• பிரிஞ்சி இலை - பாதி அளவு
• இலவங்கப்பட்டை - 1 (1 இன்ச்)
• கொத்தமல்லி விதை - 1 ஸ்பூன்
• கிராம்பு - 1
• தண்ணீர் - ஒன்றரை கப்

செய்முறை:

ஒரு பாத்திரத்தில் தண்ணீரை ஊற்றி அடுப்பில் வைத்து, அதில் வெந்தயம், பிரிஞ்சி இலை, பட்டை, தனியா விதை, கிராம்பு ஆகிய எல்லா பொருள்களையும் போட்டு நன்கு கொதிக்க விடுங்கள். அல்லது மேலே சொல்லப்பட்ட பொருள்களை லேசாக எண்ணெயில் இல்லாமல் வெறும் கடாயில் வறுத்து பொடியாகவும் அரைத்து வைத்துக் கொள்ளலாம். அதை சேர்த்து கொதிக்க விடலாம். நன்கு கொதித்து 1 டம்ளர் அளவுக்கு சுண்டி வர வேண்டும். பின்பு வடிகட்டினால் டயபடீஸ் ரிவர்ஸ் செய்யும் ஹோம்மேட் டீ ரெடி.

இதோடு தேவைப்பட்டால் சிறிது எலுமிச்சை சாறுடன் ஒரு சிட்டிகை உப்பு சேர்த்து குடிக்கலாம் அல்லது அப்படியே குடிக்கலாம். HbA1c அளவு மிக அதிகமாக இருந்தால் காலை, இரவு என இரண்டு வேளையும் இந்த டீயை குடிக்கலாம்.

டயபடீஸ் ரிவர்ஸ் டீயில் சேர்க்கப்படும் பொருள்களின் நன்மைகள்

• வெந்தயம்: இதில் கரையும் நார்ச்சத்துக்கள் அதிகமாக இருப்பதால் உடலில் கார்போஹைட்ரேட் உறிஞ்சுதல் அளவைக் குறைக்கும்.
• பிரிஞ்சி இலை: ரத்தத்தில் சர்க்கரையின் அளவு வேகமாக உயருவதைத் தடுக்கும்.
• இலவங்கப்பட்டை: இலவங்கப்பட்டையில் உள்ள சினமால்டிஹைடு இன்சுலின் உற்பத்தியை சீராக்குகிறது.
• கொத்தமல்லி விதை: உடல் மற்றும் ரத்தத்தில் உள்ள இன்ஃபிளமேஷன்களைக் குறைக்கும் வேலையைச் செய்வதால் ரத்தத்தில் குளுக்கோஸ் உயர்வைத் தடுக்கிறது.
• கிராம்பு: கணையத்தின் செயல்பாட்டைத் தூண்டி இன்சுலின் சென்சிடிவிட்டியை அதிகரிக்கிறது.

இந்த எல்லா பொருள்களையும் ஒன்றாக சேர்த்து டீயாக எடுத்துக் கொள்ளும்போது HbA1c அளவு கணிசமாகக் குறையும். மிக எளிய முறையில் வீட்டிலேயே இந்த ஹெர்பல் டீ செய்து தினமும் குடித்து வரலாம்.