தமிழ்நாட்டில் உள்ள நான்கு ராமேஸ்வரங்கள்: முழுமையான வழிகாட்டி

1. ராமேஸ்வரம் (ராமநாதபுரம்)

ராமநாத சுவாமி திருத்தலம் அமைந்துள்ள இந்த ராமேஸ்வரம், தமிழக மக்களால் மட்டுமல்லாமல் இந்தியா முழுவதிலும் உள்ள பக்தர்களால் நன்கு அறியப்பட்ட புண்ணிய தலமாகும். இங்கு ஸ்ரீ ராமர் சீதாதேவியுடன் இணைந்து சிவலிங்கத்தை பிரதிஷ்டை செய்து வழிபட்டார். மேலும், இத்தலம் "அக்னி தீர்த்த நீராடல்" தலமாக வெவ்வேறு திருப்பெயர்களுடன் ராமரின் வருகைக்கு முன்பே பிரசித்தி பெற்றிருந்ததாக சொல்லப்படுகிறது.

இங்கிருந்து தனுஷ்கோடிக்குச் செல்லும் பாதையில் சுமார் நான்கு கிலோமீட்டர் தொலைவில் நம்பு நாயகி அம்பிகை கோயில் கொண்டிருக்கிறாள். இந்த நம்பு நாயகியம்மன் கோயிலில் இருந்து சிறிய தூரத்தில் தான் ஜடாயு தீர்த்தம் உள்ளது. ஸ்ரீ ராமர் நீராடிய ஜடாயு தீர்த்தத்தின் மகத்துவத்தை சுகபிரம்மருக்கு வியாசர் விளக்கியுள்ளார். நம்பு நாயகி அருளும் பூமியும் ஜடாயு தீர்த்தமும் ராமநாதசுவாமி பிரதிஷ்டைக்கும் மிகவும் மூத்தவை என்று சொல்லப்படுகிறது.

ராமேஸ்வரம் சிவாலயத்தில் சேது மாதவப் பெருமாள் சன்னதி அருகில் புண்ணிய தானேஸ்வரர், பாபபட்சேஸ்வரர் என இரு சன்னதிகள் உள்ளன. ராமநாத சுவாமியை தரிசிக்க வரும் பக்தர்கள் கட்டாயமாக இந்த மூர்த்திகளையும் தரிசித்து வருவது பெரும் புண்ணியத்தைத் தரும். வாழ்க்கையில் துன்பங்கள், குடும்ப ரீதியாகவும் பொருளாதார ரீதியாகவும் சிக்கல்களை சந்தித்துக் கொண்டிருப்பவர்கள், ராமேஸ்வரம் சென்று இங்கு ஒரே நாளில் 32 தீர்த்தங்களில் நீராடுவது அவர்களுக்கு சகல சௌபாக்கியங்களையும் கொடுத்து வாழ்க்கையில் முன்னேறிச் செல்லக்கூடிய பாதையை ராமநாதசுவாமி காட்டுவார் என்பது பக்தர்களின் மிகப்பெரிய நம்பிக்கையாக இருந்து வருகிறது.

2. திருராமேஸ்வரம் (மன்னார்குடி அருகில்)

திருராமேஸ்வரம் என்னும் இத்தலம் மன்னார்குடி திருத்துறைப்பூண்டியில் இருந்து 22 கிலோமீட்டர் தொலைவில் அமைந்துள்ளது. ஸ்ரீ ராமபிரான் சீதாதேவியிடம் அவள் மகாலட்சுமியின் அவதாரம் என்பதை உணர்த்திய திருத்தலம் இது என்பார்கள். இங்கு திருமகள் சீதாலட்சுமி ஆக சிவலிங்கத்திற்கு பூஜை செய்யும் அபூர்வ திருக்கோலத்தை நாம் தரிசிக்கலாம்.

பக்தர்கள் பலர் வெள்ளி மற்றும் ஞாயிற்றுக்கிழமைகளில், குறிப்பாக துவாதசி மற்றும் பஞ்சமி திதி நாட்களிலும், அனுஷ நட்சத்திர நாளன்றும் இங்குள்ள உரலில் மஞ்சள் இடித்து மங்களாம்பிகைக்கு சாற்றி வழிபாடு செய்கிறார்கள். இவ்வாறு செய்வதால் அவர்களுடைய வாழ்க்கை மிகவும் மங்களகரமானதாக அமைவதோடு, அவர்கள் கேட்ட வரம் கிடைப்பதாக நம்பப்படுகிறது. சுவாமியின் திருப்பெயர் ஸ்ரீ ராமநாதசுவாமி. இழந்த பொருட்கள் மற்றும் சொத்துக்களை மீட்டெடுக்க இங்கு வந்து சுவாமி வழிபாடு செய்தால் அவை மீட்டெடுக்கும் அருளை வழங்கும் தலம் என்று பெரியவர்கள் கூறுகிறார்கள்.

3. குருவிராமேஸ்வரம் (திருவாரூர் அருகில்)

குருவி ராமேஸ்வரம் திருவாரூரில் இருந்து சுமார் 4 கிலோமீட்டர் தொலைவில் அமைந்துள்ளது. ஸ்ரீ ராமர் குருவிக்கு முக்தி தந்த தலம் இது என்று சொல்லப்படுகிறது. இத்தலத்துக்கு திருப்பள்ளிமுக்கூடல் என்றும் திருப்பெயர் உண்டு. இங்கு இறைவன் ஸ்ரீ முக்கோணநாதேஸ்வரர் என்ற திருநாமத்துடனும், இறைவி ஸ்ரீ முக்கோணநாதேஸ்வரி என்ற திருப்பெயருடனும் பக்தர்களுக்கு அருள் பாலிக்கிறார்கள். அத்துடன் இத்தலம் ஈஸ்வரன் ஜடாயுவுக்கு அவருடைய முக்தியை எடுத்துரைத்த இடமாகவும் சொல்லப்படுகிறது. அப்பொழுது ஜடாயு தான் ராவணனால் மடிந்தால் புண்ணிய தீர்த்தங்களில் நீராடிய பலன் கிடைக்காமல் போகுமே என்று வருந்தினாராம். அவருக்காக இங்கே இறைவன் உருவாக்கிய தீர்த்தமே திருமுக் கூடல் தீர்த்தம் என்கின்றன ஞானநூல்கள். ராம அவதாரத்துக்கு முன்பே ராம நாமத்தை ஜபித்து வாழ்ந்தவர்கள் `ராமகே’. இவர்கள் திரேதா யுகத்தில் பல்லாயிரக்கணக்கில் வசித்த `ராமகே’ எனும் இடமும், கயாவுக்குச் சமமாகப் போற்றப்படும் கேக்கரையும் குருவி ராமேஸ்வரத்தின் அருகிலிருப்பது விசேஷம்.

4. காமேஸ்வரம் (நாகப்பட்டினம் அருகில்)

காமேஸ்வரம் நாகப்பட்டினம் வேதாரண்யம் இடையே அமைந்துள்ளது. புனிதமான அரிச்சந்திரா நதி கடலில் கலக்கும் பிதுர்முக்தி பூமி இதுவாகும். இங்கு சிவாலயம் மற்றும் விஷ்ணு ஆலயம் இரண்டும் ஒரு சேர அமைந்த அற்புத தலம் ஆகும். இதனை `ராமேஸ்வர ராமேஸ்வரம்’ என்று அழைத்தார்கள். பின்னர் இவ்விடம் காமேஸ்வரம் என மாறிற்று. நம்முடைய விருப்பங்களை நிறைவேற்றக்கூடிய அற்புதமான தலம் என்று சொல்லப்படுகிறது.

இங்கு அருள்பாலிக்கும் அருள்மிகு காமேஸ்வரரும், காமாக்ஷி அம்பிகையும் அருளும் இந்தத் தலத்தில், திரேதா யுகத்தில் ராமனும், துவாபர யுகத்தில் கிருஷ்ணனும் வழிபட்டுள்ளார்கள். நம் வாழ்க்கையில் ஏதோ ஒரு சூழ்நிலையில் தெரிந்தும் தெரியாமலும் செய்த பொய்களால் ஏற்பட்ட பிரச்சனைகளையும் பாவங்களையும் தீர்ப்பதற்கு இத்திருத்தலத்தில் வந்து வழிபாடு செய்யலாம். அதோடு காமேஸ்வரம் திருத்தலத்திற்கு சென்று அரிச்சந்திர நதி கடலில் சங்கமமாகும் பகுதியிலோ, காமேஸ்வரம் கடற்கரையில் நீராடினால் நம்முடைய சகல பாவங்களும் விலகி நம்முடைய வாழ்க்கை செழிப்பாகும் என்பது நம்பிக்கை.