அசைவ உணவுகள் என்றாலே கொழுப்பு அதிகமாகி கொலஸ்ட்ராலாக மாறிவிடும் என்ற பயம் பலருக்கும் உண்டு. ஆனால் அசைவ உணவுகளை சரியான முறையில், சரியான அளவில் உட்கொண்டால், அது உடலுக்கு மிகவும் சிறந்த சூப்பர் ஃபுட் ஆக மாறும். குறிப்பாக, சருமப் பளபளப்பிற்கும், கொலாஜன் உற்பத்திக்கும் அசைவ உணவுகள் எப்படி உதவுகின்றன என்பதை சரும நிபுணர் டாக்டர் ஐஸ்வர்யா செல்வராஜ் விளக்குகிறார்.
கொலாஜனும் சரும பளபளப்பும்
பொதுவாக வயதாக வயதாக நம் சருமங்களில் சுருக்கங்கள், பளபளப்பு, பொலிவு குறைவது ஆகியவை ஏற்படும். இதற்கு காரணம் என்னவென்றால் நம் சருமத்தில் இருக்கும் கொலாஜன்கள் குறைவது தான். சமீபத்தில் இந்த கொலாஜன்களை சப்ளிமெண்டாக மார்க்கெட்டுகளில் ஆயிரக்கணக்கில் விற்பனை செய்கிறார்கள். ஆனால் நீங்கள் வழக்கமாக சாப்பிடும் அசைவ உணவை சரியாக சாப்பிட்டால் அதிலிருந்தே உங்களுக்கு போதிய கொலாஜன் கிடைக்கும்.
இந்த கொலாஜன் தான் நம் சருமத்தை நன்கு ஹைட்ரேடிங்காகவும், பளபளப்பாகவும், மென்மையாகவும் வைத்திருக்கும். குறிப்பாக நம்முடைய சருமத்தில் ஏற்படும் வயதான தோற்றத்திற்கான அறிகுறிகளை தடுத்து, ஸ்கின்னை மிக இளமையாக வைத்திருக்க செய்வதே இந்த கொலாஜனின் முக்கிய வேலை. வைட்டமின் சி உணவுகள் உள்ளிட்டவற்றில் கொலாஜன்கள் இருக்கின்றன. ஆனால் அசைவ உணவு சாப்பிடுபவர்களுக்கு இந்த கொலாஜன் கிடைப்பது இன்னும் எளிமையான விஷயம். அதற்கு என்னென்ன அசைவ உணவுகளை எடுத்துக் கொள்ள வேண்டும் என்று தெரிந்து கொள்வோம்.
சரும பளபளப்புக்கு உதவும் 4 அசைவ உணவுகள்
1. எலும்பு சூப்
அசைவ உணவுகளிலேயே மிக அதிக அளவில் கொலாஜன் இருப்பது இந்த எலும்பு சூப் தான். எலும்பு சூப்பில், எலும்புகளுக்கு உள்ளே இருக்கிற மஜ்ஜையில் தான் அதிக அளவில் கொலாஜன் இருக்கிறது. அதை நிறைய பேர் வெறும் கொழுப்பு என்று நினைத்துக் கொண்டிருக்கிறார்கள். ஆனால் அது உங்கள் சருமத்தை கொழுக் மொழுக் என்று ஆக்கப்போகும் கொலாஜன் என்பது நிறைய பேருக்கு தெரிவதில்லை. அதேசமயம் இந்த கொலாஜன் எல்லா வகை எலும்பு சூப்புகளில் இருந்தும் கிடைக்காது. மாட்டு இறைச்சி எலும்பு, மட்டன் எலும்பு சூப்புகளில் இருந்து தான் கொலாஜன் கிடைக்கும்.
2. முட்டை
முட்டையில் புரோலின் என்னும் ஒரு ஆற்றல்மிக்க அமினோ அமிலம் இருக்கிறது. இதுதான் நம்முடைய சருமத்தில் கொலாஜன் உற்பத்தியை அதிகரிக்க செய்யக்கூடிய சூப்பர் அமினோ அமிலம். முழு முட்டை எடுத்துக் கொள்ளலாம். நிறைய பேர் மஞ்சள் கருவில் கொழுப்பு அதிகம் என்று முற்றிலும் தவிர்ப்பார்கள் ஆனால் தினமும் ஒரு மஞ்சள் என்னும் அளவில் எடுத்துக் கொள்ளலாம். முட்டையின் மஞ்சள் கருவை அளவோடு எடுத்துக் கொண்டால் அதில் நம் உடலுக்கு தேவையான அத்தனை நல்ல கொழுப்பு அமிலங்களும் கொட்டி கிடக்கிறது.
3. மீன் உணவுகள்
மீன் வகைகளில் ஒமேகா 3 கொழுப்பு அமிலங்கள் அதிக அளவில் இருக்கின்றன. இந்த ஒமேகா 3 கொழுப்பு அமிலங்களுக்கு கொலாஜன் உற்பத்தியை தூண்டும் மற்றும் அதிகரிக்கச் செய்யும் ஆற்றல் அதிகம். அசைவம் சாப்பிடுபவர்கள் வாரத்திற்கு இரண்டு அல்லது மூன்று நாட்களாவது மீன் உணவுகளை கட்டாயம் டயட்டில் சேர்க்க முயற்சி செய்யுங்கள். இது உங்களுக்கு தேவையான ஒமேகா 3 கொழுப்பு மட்டுமல்லாது போதிய புரதத்தைக் கொடுக்கிறது. குறிப்பாக கொலஸ்ட்ரால் இல்லாத நல்ல புரதங்கள் மீன் உணவுகளில் அதிகம். அதிலும் இந்தியன் சால்மன் மற்றும் அட்லாண்டிக் சால்மன் ஆகியவற்றில் ஒமேகா 3 கொழுப்பு அமிலத்தின் அளவும் கொலாஜன் உற்பத்தி திறனும் மிக மிக அதிகம். அதைத்தவிர மத்தி மீன், கானாங்கெளுத்தி, கிழங்கா போன்ற மீன் வகைகளையும் அதிகமாக எடுத்துக் கொள்ளலாம்.
4. சிக்கன்
சிக்கன் ஒரு சூப்பர் ப்ரோட்டீன் சோர்ஸ். இதிலுள்ள புரதம் தான் நம் சருமத்தின் ஸ்ட்ரக்சரை பாதுகாப்பதில் முக்கிய பங்கு வகிக்கிறது. குறிப்பாக சருமத்தின் எலாஸ்ட்சிட்டியை அதிகரித்து தோல் சுருக்கம், சருமம் தளர்ந்து தொங்குவதுபோன்று ஆவதையும் தடுத்து தசைகளை இறுக்கமாக வைத்திருக்கச் செய்கிறது. வாரத்தில் மூன்று முதல் நான்கு நாட்கள் சிக்கனை எண்ணெய் சேர்க்காமல் ஹெல்தியான முறையில் கலோரிகளைக் கட்டுப்படுத்தி எடுத்துக் கொண்டு வரும்பொழுது, தொடர்ச்சியான புரோட்டின் டயட் உங்கள் சருமத்தை வயதாகாமல் பார்த்துக் கொள்வதை விட கொலாஜன் சிதைவு ஏற்படாமல் தடுக்கும். அதோடு கொலாஜன் உற்பத்தியை அதிகரிக்கவும் செய்யும். இதனால் நீங்கள் தசை வளர்ச்சி அடைவது மட்டுமின்றி சரும பளபளப்பையும் பெற முடியும்.
அசைவம் சாப்பிடும்போது கவனிக்க வேண்டிய 2 முக்கிய விஷயங்கள்
அசைவ உணவு என்றாலே கொலஸ்ட்ரால் அதிகமாகிவிடும் என்று பயப்படுகிறார்கள். டாக்டர் ஐஸ்வர்யா செல்வராஜ் சொல்வதை கேட்டிருப்பீர்கள். அசைவ உணவு எப்போது நமக்கு கெடுதலை தரும் என்றால் அதை நாம் சமைக்கும் முறையும், சாப்பிடும் அளவும்தான்.
- 1. சமைக்கும் முறை: நிறைய எண்ணெய் சேர்த்து சமைப்பது அல்லது பொரித்து, வறுத்து சாப்பிடும்போது கலோரிகளும் அதிகமாகும். அதில் சாச்சுரேட்டட் கொழுப்பு அமிலங்களும் அதிகமாக்கி கெட்ட கொலஸ்ட்ராலாக மாறும்.
- 2. சாப்பிடும் அளவு: எண்ணெய் குறைவாக இருந்தாலும் கலோரிகளை மனதில் வைத்துக் கொள்ளாமல் நிறைய எடுத்துக் கொள்ளும் பொழுது அது உடல் பருமனுக்கு காரணமாகும்.
மேலே குறிப்பிட்ட இரண்டு தவறுகளையும் தவிர்த்து விட்டு ஆரோக்கியமான முறையில் சரியான அளவில் அசைவ உணவுகளை எடுத்துக் கொண்டால் உங்கள் ஒட்டுமொத்த உடலுக்கும் ஆற்றல் கிடைக்கும். ஆரோக்கியமும் அதிகரிக்கும். வயதாகும்போது ஏற்படும் தசையிழப்பைக் கட்டுப்படுத்தி தசை வளர்ச்சியை அதிகரிப்பது, ஊட்டச்சத்துக்கள் குறைபாட்டை தடுப்பது போன்றவற்றோடு சேர்த்து உங்கள் சருமத்தையும் இளமையாகவும் பளபளப்பாகவும் மாற்றும்.
அடிக்கடி கேட்கப்படும் கேள்விகள் (FAQ)
பொறுப்பு துறப்பு:
இந்த கட்டுரையில் சொல்லப்பட்டவை வெறும் தகவல் நோக்கங்களுக்காக மட்டும் தான். இது மருத்துவரின் இன்ஸ்டகிராம் வீடியோவை அடிப்படையாகக் கொண்டு உருவாக்கப்பட்டது. இதன் உண்மைத்தன்மை, துல்லியம் மற்றும் செயல்திறன் ஆகியவற்றுக்கு Jothidam360 பொறுப்பாகாது. மருத்துவ ஆலோசனைக்கு மருத்துவரை அணுகவும்.