தலைமுடி உதிரும் பிரச்சனை ஆண், பெண் இருபாலருக்கும் பெரும் கவலையைத் தருகிறது. குறிப்பாக பருவ கால மாற்றங்களின் போதும், குளிர்காலத்திலும் முடி உதிர்தல் அதிகரிக்கும். விதவிதமான ஷாம்புகள், கண்டிஷனர்கள், சீரம்கள் பயன்படுத்தியும் பலன் கிடைக்காதவர்களுக்கு, இங்கு சொல்லப்படும் எளிய வீட்டு வைத்திய முறை அற்புதமான தீர்வை அளிக்கும். இது தலைமுடி உதிர்வதைக் கட்டுப்படுத்தி, முடி வளர்ச்சியைத் தூண்டும். இயற்கையான முறையில் உங்கள் கூந்தலை ஆரோக்கியமாக மாற்ற இந்த எளிய டிப்ஸ்களை பயன்படுத்துங்கள்.
முடி உதிர்வை கட்டுப்படுத்த ஷாம்புவுடன் டிகாஷன் சேர்ப்பது எப்படி?
தலைமுடி உதிர்வதை கட்டுப்படுத்தி, அடர்த்தியான முடி வளர்ச்சியை தூக்கும் இந்த இயற்கையான முறையில் டிகாஷன் மற்றும் சில பொருட்களை ஷாம்புவுடன் சேர்த்து பயன்படுத்த வேண்டும். இதை எப்படி தயாரிப்பது என்று பார்ப்போம்.
ஸ்டெப் 1: டிகாஷன் தயாரித்தல்
ஒரு பாத்திரத்தில் 300 மில்லி தண்ணீர் சேர்த்து நன்கு கொதிக்க விடவும். கொதிக்கும் தண்ணீரில் ஒரு டீஸ்பூன் டீ தூள் சேர்த்து, மீண்டும் கொதிக்க விடவும். நன்கு கொதித்ததும், அரை ஸ்பூன் காபி பொடி சேர்த்து கொதிக்க விடவும். இது 100 மில்லியாக சுண்டிய பிறகு, அடுப்பை அணைத்து வடிகட்டி தனியாக வைத்துக் கொள்ளவும். இந்த டிகாஷன் உங்கள் முடிக்கு இயற்கையான நிறத்தையும் பாதுகாப்பையும் அளிக்கும்.
ஸ்டெப் 2: அரிசி மற்றும் வெந்தய நீர் தயாரித்தல்
முதல் நாள் இரவு ஒரு ஸ்பூன் அரிசி மற்றும் ஒரு ஸ்பூன் வெந்தயத்தை ஒரு டம்ளர் தண்ணீரில் ஊற வைக்கவும். அடுத்த நாள் காலையில், ஊற வைத்த அரிசி, வெந்தயத்துடன் அரை ஸ்பூன் ஆளி விதையையும் சேர்த்து, அதே தண்ணீருடன் கொதிக்க விடவும். தேவைப்பட்டால் சிறிது தண்ணீர் சேர்த்துக் கொள்ளலாம். அரிசி, வெந்தயம் வெந்து, ஆளி விதையுடன் சேர்ந்து சிறிது திக்காகி ஜெல் பதம் வரும்போது அடுப்பை அணைத்துவிடவும். சூடாக இருக்கும்போதே இதை வடிகட்டி எடுத்துக்கொள்ளவும். ஆறிவிட்டால் ஜெல் கெட்டியாகி வடிகட்டுவது கடினமாகிவிடும்.
ஸ்டெப் 3: ஷாம்புவுடன் கலத்தல்
மேலே தயார் செய்த டிகாஷன் மற்றும் அரிசி, வெந்தய, ஆளி விதை ஜெல்லிலிருந்து தேவையான அளவு எடுத்து ஒரு கிண்ணத்தில் சேர்த்துக்கொள்ளவும். இந்த கலவையுடன் நீங்கள் வழக்கமாக பயன்படுத்தும் ஷாம்புவை சேர்த்து நன்கு கலக்கவும். இந்தக் கலவையைக் கொண்டு வழக்கம்போல் தலைக்கு ஷாம்பு தேய்த்து குளிக்கலாம். இது உங்கள் தலைமுடி உதிர்வதை குறைத்து, இயற்கையான முடி வளர்ச்சிக்கு உதவும்.
ஸ்டெப் 4: கண்டிஷனர் பயன்படுத்துதல்
ஷாம்பு போட்டு குளித்த பிறகு கண்டிஷனர் பயன்படுத்துவது மிக முக்கியம். வீட்டு வைத்திய முறைகளை பயன்படுத்தும் போது கண்டிஷனர் தேவையில்லை என்று பலர் நினைக்கிறார்கள், அது தவறு. இத்தகைய வீட்டுப் பொருட்கள் முடியை வறட்சி அடையச் செய்ய வாய்ப்பு உள்ளது. எனவே, ஒவ்வொரு முறை ஷாம்பு பயன்படுத்தும் போதும், கண்டிஷனரை அப்ளை செய்வது அவசியம். இது உங்கள் தலைமுடிக்கு மென்மையையும் பாதுகாப்பையும் அளிக்கும்.
முடி உதிர்வதைத் தடுக்க கூடுதல் குறிப்புகள்
- ஈரமான முடியை சீவுதல்: தலைக்கு குளித்து முடித்ததும் முடி ஈரமாக இருக்கும்போது சீப்பு கொண்டு சீவக் கூடாது. அப்போது வேர்க்கால்கள் தளர்வாக இருப்பதால் முடி அதிகமாக உதிர வாய்ப்புள்ளது.
- இயற்கையான உலர்த்துதல்: முடிந்தவரை தலைமுடியை இயற்கையான காற்றில் அல்லது ஃபேன் காற்றில் உலர்த்த முயற்சி செய்யுங்கள். ஹேர் டிரையர் போன்ற சூடு படுத்தும் கருவிகள் முடியை டேமேஜ் செய்யும்.
- மென்மையான துண்டுகள்: தலையை துவட்ட மைக்ரோ பைபர் அல்லது மென்மையான துணிகளை பயன்படுத்துங்கள்.
- சீரம் பயன்பாடு: முடி லேசாக காய்ந்ததும் தலைமுடிக்கு மட்டும் சீரம் பயன்படுத்துவது அவசியம். இந்த சமயத்தில் எண்ணெய் அப்ளை செய்வதை தவிர்ப்பது நல்லது.
- முடி பாதுகாப்பு: மேலே குறிப்பிட்ட இந்த சின்ன செயல்முறையை செய்து வந்தாலே உங்கள் தலைமுடி உதிர்வது குறைவது மட்டும் இல்லாமல், டீ, காபி பொடி சேர்த்திருப்பதால் இதில் உள்ள நிறமே உங்களுடைய தலைமுடியின் நிறத்தையும் பாதுகாக்கும். இளநரை வராமல் தடுக்கவும் உதவி செய்யும்.