சரும பராமரிப்புக்கு இயற்கை பொருள்கள் எப்போதுமே சிறந்தது. அந்த வகையில், சமையலுக்கு பயன்படுத்தப்படும் மசூர் பருப்பை கொண்டு உங்கள் அழகை அதிகரித்து, பொலிவான சருமத்தைப் பெறலாம். சருமத்தில் இருக்கும் இறந்த செல்களை வெளியேற்றுவதிலும், நச்சுக்களை அகற்றுவதிலும், அதிகப்படியான எண்ணெய் சுரப்பை கட்டுப்படுத்துவதிலும் மசூர் பருப்பு சிறப்பாக செயல்பட்டு சருமத்தை பொலிவாக வைத்திருக்க செய்கின்றன. பல்வேறு வகையான மசூர் பருப்பு ஃபேஸ் பேக்குகள் மற்றும் அவற்றின் நன்மைகளை இங்கே விரிவாகக் காண்போம்.
இறந்த செல்கள் வெளியேற மசூர் பருப்பு ஃபேஸ் பேக்
தேவையான பொருட்கள்:
- மசூர் பருப்பு பொடி: 1 டீஸ்பூன்
- அரிசி மாவு: 1 டீஸ்பூன்
- மஞ்சள்: சிட்டிகை
- பன்னீர் அல்லது தண்ணீர்: தேவைக்கு
செய்முறை:
அனைத்துப் பொருட்களையும் ஒன்றாகக் கலந்து முகம் முழுவதும் போடவும். 15-20 நிமிடங்கள் கழித்து முகத்தை வெதுவெதுப்பான நீரில் சுத்தம் செய்யவும்.
நன்மைகள்:
சருமத்தில் இருக்கும் இறந்த செல்களை அகற்றுவதில் மசூர் பருப்பு சிறப்பாக உதவுகிறது. இந்த மாவு எக்ஸ்ஃபோலியேஷன் செய்யப் பயன்படுத்தும் போது, அது சருமத்தை வறட்சியிலிருந்து பாதுகாத்து சருமத்தை மென்மையாகவும் பளபளப்பாகவும் மாற்றுகிறது.
மென்மையான சருமத்துக்கு மசூர் பருப்பு பால் ஃபேஸ் பேக்
தேவையான பொருட்கள்:
- மசூர் பருப்பு பொடி: 1 டீஸ்பூன்
- பால்: தேவைக்கு
செய்முறை:
பாலில் மசூர் பருப்பு பொடியை நன்றாகக் குழைத்து சில நிமிடங்கள் வைத்திருக்கவும். பிறகு இதை முகம் முழுவதும் தடவி 15 நிமிடங்கள் கழித்து மந்தமான நீரில் கழுவினால் சருமம் மென்மையாக இருக்கும்.
நன்மைகள்:
மசூர் பருப்பில் இருக்கும் புரதங்கள், தாதுக்கள் மற்றும் வைட்டமின்கள் சருமத்தை சுத்தம் செய்கிறது. அழுக்கை வெளியேற்றுவதன் மூலம் சருமத்தின் மென்மையை அதிகரிக்கிறது.
சருமம் பிரகாசமாக இருக்க மசூர் பருப்பு தயிர் ஃபேஸ் பேக்
தேவையான பொருட்கள்:
- மசூர் பருப்பு பொடி: 1 டீஸ்பூன்
- தயிர்: 2 டீஸ்பூன்
செய்முறை:
தயிரில் மசூர் பருப்பு பொடி சேர்த்து நன்றாகக் கலக்கி கொள்ளவும். இதை முகம் முழுவதும் தடவி பிறகு 20-30 நிமிடங்கள் கழித்து முகத்தை கழுவி விட வேண்டும். வாரம் ஒருமுறை இதை செய்யலாம்.
நன்மைகள்:
மசூர் பருப்பு சருமத்தில் உண்டாகும் பழுப்பு நிறத்தைக் குறைத்து சரும நிறத்தை மேம்படுத்தும். மேலும் கரும்புள்ளிகள், தழும்புகள் போன்றவற்றையும் கட்டுப்படுத்தி சருமத்துக்கு இயற்கையான பளபளப்பையும் பிரகாசத்தையும் அளிக்கும்.
முகப்பரு வடுக்கள் குறைய மசூர் பருப்பு மஞ்சள் ஃபேஸ் பேக்
தேவையான பொருட்கள்:
- மசூர் பருப்பு பொடி: 1 டீஸ்பூன்
- மஞ்சள்: அரை டீஸ்பூன்
- தண்ணீர்: தேவைக்கு
செய்முறை:
மசூர் பருப்பு பொடி, மஞ்சள், தண்ணீர் மூன்றையும் நன்றாக சேர்த்து குழைத்து பிறகு முகம் முழுவதும் தடவி விடவும். 10 நிமிடங்கள் கழித்து முகத்தை சுத்தம் செய்யவும்.
நன்மைகள்:
மசூர் பருப்பு அழற்சி எதிர்ப்பு பண்புகளைக் கொண்டுள்ளது. இதனுடன் மஞ்சளும் சேரும் போது சரும எரிச்சலைக் குறைத்து, முகப்பரு வடுக்கள் மற்றும் உணர்திறன் வாய்ந்த சருமப் பிரச்சனைகளைக் கட்டுப்படுத்த உதவுகிறது.
சருமம் நீரேற்றமாக வைத்திருக்க மசூர் பருப்பு ஆரஞ்சு ஃபேஸ் பேக்
தேவையான பொருட்கள்:
- மசூர் பருப்பு பொடி: 1 டீஸ்பூன்
- ஆரஞ்சு பொடி: 1 டீஸ்பூன்
- பன்னீர்: தேவைக்கு
செய்முறை:
மசூர் பருப்பு பொடியுடன் ஆரஞ்சு பொடியை சேர்த்து நன்றாக குழைத்து பன்னீர் சேர்த்து கலந்து முகம் முழுவதும் தடவி பிறகு 20 நிமிடங்கள் கழித்து முகத்தை மந்தமான நீரில் கழுவி விடவும்.
நன்மைகள்:
மசூர் பருப்பு பொடியுடன் ஆரஞ்சு பொடி கலந்து பயன்படுத்துவது சருமத்தின் ஈரப்பதத்தை அதிகரிக்க செய்யும். சருமம் நீரேற்றமாக இருக்க விரும்பினால் இந்த பேக் உங்களுக்கு பெரிதும் உதவும்.
மசூர் பருப்பு பொடி தயாரிக்கும் முறை:
மசூர் பருப்பை சுத்தம் செய்து, மண் போக மெல்லிய துணியில் துடைக்கவும் அல்லது நீரில் அலசி வெயிலில் உலர வைக்கவும். இவை நன்றாக உலர்ந்ததும் ப்ளெண்டரில் மைய அரைக்கவும். பிறகு இதை காற்று புகாத டப்பாவில் சேர்த்து பதப்படுத்தி வைக்கவும். இரண்டு மாதங்களுக்கு மேல் இதை வைத்திருக்க வேண்டாம்.
இறுதியாக, மசூர் பருப்பு சருமத்துக்கு செய்யும் நன்மைகள் என்ன, எப்படி எதனுடன் பயன்படுத்துவது என்பது குறித்து தெரிந்துகொண்டோம். மசூர் பருப்பு சரும பிரச்சனைக்கு பயன்படுத்தலாம் என்றாலும், இதை பயன்படுத்திய பிறகு ஏதேனும் அலர்ஜி இருந்தால் சரும பராமரிப்பு நிபுணரை அணுகுவது நல்லது.