முருகப் பெருமான் நம்முடைய வேண்டுதல்களை கேட்பாரா? நம்முடைய துன்பங்களை தீர்த்து வைப்பாரா? என்ற கேள்வி பல பக்தர்களின் மனதில் எழும். இந்த குழப்பங்களை நீக்கி, முருகனின் முழுமையான அருளைப் பெறவும், கர்ம வினைகளை அழிக்கவும் உதவும் எளிய பக்தி வழிமுறைகளை இங்கு காணலாம்.
முருகன் நம் வேண்டுதல்களை கேட்கும் வழி
நாம் பேசுவதை முருகன் கேட்கிறாரா? நம்முடைய வேண்டுதல் அவரின் காதுகளில் விழுகிறதா? என்ற சந்தேகம் பலருக்கும் உண்டு. முருகப் பெருமான் மீது தீராத பக்தி கொண்ட பலர், அவர் எப்போதும் தனக்கு துணையாக இருக்கிறார் என்ற நம்பிக்கை கொண்டிருந்தாலும், சில கஷ்டமான, சோதனையான சூழல் வரும் போது, "முருகன் உண்மையாகவே நாம் பேசுவதை கேட்கிறாரா?" அப்படி நாம் பேசுவதை கேட்டு நம்முடைய துன்பங்களை அவர் தீர்த்து வைத்து விட மாட்டாரா? நமக்கு நன்மை நடந்து விடாதா? முருகப் பெருமானின் அருள் கிடைத்து விடாதா? என்ற குழப்பத்துடனும், ஏக்கத்துடனும் இருக்கும் பக்தர்கள் ஏராளம். இதே குழப்பங்கள், கேள்விகள் உங்களுக்குள் இருந்தாலும், முருகன் உங்களின் குறைகளை, வேண்டுதல்களை கேட்டு அவற்றை நிறைவேற்றி வைக்க வேண்டும் என நினைத்தீர்கள் என்றால், தினமும் காலையில் எழுந்து குளித்து விட்டு, மனதில் முருகப் பெருமானை நினைத்து, நெற்றியில் திருநீறு வைக்கும் போது, இந்த பக்தி பாடலை நம்பிக்கையுடன் சொல்லி வாருங்கள்.
"வந்த வினையும் வருகின்ற வல்வினையும் கந்தன் என்று சொல்லிட கலங்குமே செந்தில் நகர் சேவகா என்று திருநீறு அணிபவருக்கு மேவ வாராதே வினை"
இது திருமுருகாற்றுப்படை பாடலாகும். இந்த பாடலை சொல்லி நெற்றியில் நம்பிக்கையுடன் திருநீறு பூசி வாருங்கள். உங்களின் வேண்டுதல், நீங்கள் பேசும் வார்த்தைகள் முருகனுக்கு கேட்கும். அவரும் உங்களுடன் பேசுவார். இது ஜோதிடம் சார்ந்த நம்பிக்கை மட்டுமல்ல, ஆழ்ந்த பக்தியையும் நம்பிக்கையையும் குறிக்கும்.
கர்ம வினைகள் நீங்கி முருகனின் அருள் பெற
நாம் இந்த பிறவியில் அனுபவிக்கும் துன்பங்கள் அனைத்திற்கும் முந்தைய பிறவிகளில் செய்த பாவங்களின் விளைவாக ஏற்பட்ட வினை பயன்களால் தான் நடக்கிறது. அதே போல் இறையருள் நமக்கு முழுமையாக கிடைக்காமல் தடைபடுவதற்கும் கூட இந்த கர்மவினைகளே காரணமாக உள்ளதாக சொல்லப்படுகிறது. இந்த கர்மவினைகள் அழிந்து, முருகனின் அருள் கிடைக்க வேண்டும் என்பதற்காக பாடப்பட்டது தான் இந்த பாடல். இதற்கு முந்தைய பிறவிகளில் ஏற்பட்ட கர்மவினைகளும், அதனால் இனி எனக்கு வரப் போகும் துன்பங்களும் கந்தன் என்று முருகப் பெருமானின் திருநாமத்தை மனமுருகி சொன்னாலே ஓடி விடும்.
திருச்செந்தூர் நகரில் வீற்றிருந்து அருள் புரியும் சேவல் கொடி ஏந்தி, எனக்கு காவலனாக இருந்து என்னை காக்கும் முருகனை நினைத்து நெற்றியில் திருநீறு அணிப்பவரை எந்த ஒரு தீய வினைகளும், துன்பங்களும் நெருங்காது என்பது தான் இந்த பாடலின் பொருள்.
"சேல்பட் டழிந்தது செந்தூர் வயற்பொழில் தேங்கடம்பின் மால்பட் டழிந்தது பூங்கொடி யார்மனம் மாமயிலோன் வேல்பட் டழிந்தது வேலையுஞ் சூரனும் வெற்புமவன் கால்பட் டழிந்ததிங் கென்றலை மேலயன் கையெழுத்தே"
இந்த கந்தர் அலங்காரம் பாடலை சொல்லி தினமும் நெற்றியில் திருநீறு அணிந்து வந்தால் எப்படிப்பட்ட மோசமான தலையெழுத்தும் மாறி விடும் என சொல்லப்படுகிறது. முருகா...உன்னுடைய வேலால் எப்படி சூரனை அழித்தாயோ அதே போல் உன்னுடைய திருவடிகளை சரணடைந்த என்னுடைய தலை மீது பிரம்மன் மோசமாக எழுதி இருக்கும் தலையெழுத்தை அழித்து விடும் என்பது தான் இந்த பாடலின் பொருள். ஆறுபடை வீடுகள் மட்டுமல்ல, அனைத்து முருகன் ஆலயங்களிலும் இந்த பக்தி வழிமுறைகளை பின்பற்றலாம். தமிழ் மண்ணின் பாரம்பரிய பக்தி வழிமுறைகளில் இதுவும் ஒன்று.