சரஸ்வதி தேவியின் அருள்: சத்தியவிரதனின் ஞானப் பயணம்

சரஸ்வதி பூஜை: அறிவு வடிவ தெய்வம்

கல்வி, கலைகளில் தேர்ச்சி, வெற்றி ஆகியவை கிடைப்பதற்கு கலைமகளின் அருள் அனைவருக்கும் வேண்டும். அனைவரும் சரஸ்வதி தேவியை வழிபடுகிறோம். நம் சாஸ்திரங்கள் சாவித்ரி, காயத்ரி, சரஸ்வதி என அறிவையே பெண் தெய்வ உருவில் வழிபடுமாறு கூறுகின்றன. உலகின் மிகச் சிறந்த மந்திரமாகப் போற்றப்படும் காயத்ரி மந்திரத்தின் பொருள், 'என் அறிவானது, மனதை அடக்கி, நல்வழிப்படுத்த இயலாமல் மங்கும் போதெல்லாம், ஞானமே வடிவாகிய அந்த சக்தியானவள் அறிவுக்கு ஆற்றலைத் தந்தருள வேண்டும்' என்பதாகும்.

இப்படி வேதங்கள், சாஸ்திரங்கள் மற்றும் உலக உயிர்களின் அறிவாக இருக்கும் சக்தியை, ஸ்ரீ மஹா சரஸ்வதி தேவியாக வழிபடும் நாளாக, சரஸ்வதி பூஜை கொண்டாடப்படுகிறது. இந்த பூஜை மூலம் தெய்வீக அறிவைப் பெற்று வாழ்வில் முன்னேறலாம். ஜோதிட ரீதியாகவும், அறிவின் கிரகம் வலுப்பெற சரஸ்வதி வழிபாடு உகந்ததாகும்.

சரஸ்வதிக்கு யாரை பிடிக்கும்? சத்தியவிரதனின் கதை

பொய், சூது, வாது ஆகிய தீயக்குணங்கள் கொண்டவர்களை அம்பிகை விரும்ப மாட்டாள். உண்மை, பக்தி, அன்பு கொண்டவர்கள் எவ்வளவு வறியவர்களாக, இயலாதவர்களாக இருந்தாலும், அவர்களைத் தேடிச் சென்று, அறிவாற்றல் எனும் பெரும் ஐஸ்வர்யமான சக்தியை அருளுவாள்.

ஒரு முனிவர் புத்திர பாக்கியமில்லாமல் பெரிய யாகம் செய்தார். யாகத்தை நடத்திய வயதான வேதியர், மந்திரங்களை நிறுத்தி நிறுத்தி ஓதினார். இதைக் கண்டு முனிவர் ஏளனம் செய்ய, அவ்வேதியர் மனம் வருந்தி பாதியிலேயே வெளியேறினார். இதன் விளைவாக, யாகத்தின் பயனாய் பிறந்த குழந்தை வாய் பேச இயலாத நிலையில் பிறந்தது. எக்காரணத்தைக் கொண்டும் பெரியவர்களை அவமதிப்பது கூடாது என்பதற்கு இதுவே சிறந்த உதாரணம்.

வளர்ந்த பையன், மற்றவர்களால் கேலி செய்யப்பட்டதால் தனிமையை நாடிச் சென்றான். ஆற்றங்கரையின் மரத்தடியில் வசித்து, காலையில் எழுந்து குளித்து, கண்மூடி காயத்ரி மந்திரம் ஜபம் செய்து, இறைவனை எண்ணி தியானம் செய்யப் பழகினான். தனக்குத் தானே சில கட்டுப்பாடுகளை விதித்து கொண்டான்: எக்காரணத்தைக் கொண்டும் பொய் பேசக் கூடாது, யாரையும் துன்புறுத்தக் கூடாது.

காயத்ரி மந்திரத்தின் மகிமை மற்றும் சரஸ்வதியின் அருள்

சத்தியத்தையே விரதமாகக் கொண்டு வாழ்ந்த அவனது ஆற்றலைக் கண்டு எல்லோரும் அவனை சத்தியவிரதன் என்று அழைக்கத் துவங்கினர். ஒருநாள், அவன் தவம் செய்து கொண்டிருந்தபோது, காட்டுப்பன்றி ஒன்று அம்பு குத்தி ரத்தம் பெருக ஓடி வருவதைக் கண்டான். அதைப் பார்த்து 'ஐய்ய்...' என்று கூவினான். பன்றியைத் தேடி வேடன் வந்தான், சத்தியவிரதனிடம் பன்றியைப் பற்றிக் கேட்க, சிறுவனுக்கு தர்மச்சங்கடமான சூழல் ஏற்பட்டது.

பொய் பேசாமல் பன்றியையும் காப்பாற்ற அவன் சரஸ்வதி தேவியை மனமார வேண்டினான். 'ஐய்ய்...' என்று அவன் கூவியது, சரஸ்வதியின், 'ஐம்' எனும் பீஜாட்சர மந்திரத்தின் ஒரு பகுதியாகும். அவனது சத்தியத்தையும் பக்தியையும் ஏற்று, அன்னை சரஸ்வதி, அவன் பேசா தன்மை நீங்கி, மிகப் பெரிய அறிவாளியாகத் திகழ அருள்பாலித்தாள். சத்தியவிரதன் பேசிய "யா பஸ்யதி சா நவததியா வததி சா நபஸ்யதி.." என்ற வார்த்தைகள், 'எது கண்டதோ அது பேசாது; எது பேசுமோ அது காணாது' எனப் பொருள் பட்டு, பொய்யும் பேசாமல், பன்றியையும் காப்பாற்றினான். இதுதான் மெய்யான தமிழ் ஆன்மிகத்தின் மாண்பு.

சரஸ்வதியை வழிபடும் முறை

வாய் பேச இயலாமல் பிறந்து, சத்தியத்தையே விரதமாகக் கொண்டு, தவம் செய்து சரஸ்வதி அருளால் பேச்சாற்றலும் அறிவாற்றலும் பெற்ற சத்தியவிரதன் பின்னாளில் நிறைய நூல்களும் எழுதியுள்ளான். மஹா நவமி எனப்படும் சரஸ்வதி பூஜை நன்னாளில் அம்பிகையை வழிபடுவதால், அறிவாற்றலும், மன உறுதியும் பெற முடியும்.

சரஸ்வதி பூஜையன்று வழக்கம்போல் பூஜைகளைச் செய்து, புத்தகங்கள் மற்றும் ஆயுதங்களுக்கு சந்தனம், குங்குமம் இட்டு, பூ சார்த்த வேண்டும். நடுவில் நான்கு இதழ்களும் சுற்றிலும் எட்டு இதழ்களும் கூடிய தாமரைக் கோலமிட்டு அலங்கரிக்கவும். மையத்தில், 'ஓம்...' என்றும் எல்லா இதழ்களிலும், 'ஐம்' என்றும் எழுதவும். மையத்தில் திருவிளக்கும் நான்கு மற்றும் எட்டு இதழ்களில் தீபங்கள் ஏற்றி வைக்கவும்.

சரஸ்வதி வழிபாட்டு மந்திரம்:

"ஓம் ஸ்ரீமஹாசரஸ்வத்யை நமஹ"

"ஓம் ஐம் வாக்தேவ்யை நமஹ"

"ஓம் ஞான தாயின்யை நமஹ" என்றும் அர்ச்சனை செய்யவும்.

"மேதே சரஸ்வதிவரே பூதி பாப்ரவிதாமஸிநியதே த்வம் ப்ரசீதேசி நாராயணி நமோஸ்துதே" என்ற மந்திரம் சொல்லி புஷ்பம் சார்த்தவும்.

நிவேதனம் மற்றும் ஆராதனை:

பால் கற்கண்டு சாதம் மற்றும் இனிப்புப் பண்டங்களுடன், பாசிப்பருப்பு சுண்டலும் நிவேதனம் செய்து, சூடம் ஏற்றிக் காண்பிக்கவும். பெண்கள், சுமங்கலிகளுக்கு ரவிக்கைத் துண்டுடன், மங்களப் பொருட்களும் வழங்கி, இறுதியில் ஆரத்தி எடுத்து தீபத்தை பூஜையறையில் சேர்த்து நிறைவு செய்யவும்.

சரஸ்வதி ஸ்லோகம்:

"யாகுந்தேந்து துஷாரஹார தவளாயாஸுப்ர வஸ்த்ராவ்ருதாயவீணா வரதண்ட மண்டிதகராயாஸ்வேத பத்மாஸனாயா ப்ரம்மாச்யுத சங்கர ப்ரப்ருதிபி:தேவைஸ்ஸதா பூஜிதாஸா மாம் பாது ஸரஸ்வதி பகவதீநிஸ்ஸேஷஜாட்யாபஹா"