சோமவார பிரதோஷம் மற்றும் மாத சிவராத்திரி வழிபாட்டு பலன்கள்

பிரதோஷமும் மாத சிவராத்திரியும்: அரிய சங்கமம்

மாதந்தோறும் வரும் திரியோதசியை பிரதோஷம் என்றும், சதுர்த்தசியை மாத சிவராத்திரி என்றும் தமிழ் மக்கள் கொண்டாடுகிறோம். இவை இரண்டுமே சிவ வழிபாட்டிற்கு மிகவும் ஏற்ற நாட்களாகும். சில மாதங்களில் திரியோதசி, சதுர்த்தசி ஆகிய இரண்டு திதிகளும் ஒரே நாளில் இணைந்து வருவதுண்டு. இப்படி பிரதோஷமும், மாத சிவராத்திரியும் இணைந்து வரும் நாள் மிகவும் சிறப்பு வாய்ந்ததாகும். இந்த அற்புதமான நாளில் சிவ பெருமானை குறிப்பிட்ட முறையில் வழிபட்டால் அவரது பரிபூரண அருளை பெற முடியும். அதோடு வாழ்வில் இருக்கும் தடைகள் அனைத்தும் நீங்கும் என்பது நம்பிக்கை.

இந்த ஆண்டு ஜூன் மாதத்தில் பிரதோஷம் மற்றும் மாத சிவராத்திரி இரண்டும் ஒரே நாளில் இணைந்து ஜூன் 23ம் தேதியான இன்று அமைந்துள்ளது. அதுவும் இவை இரண்டும் இணைந்து திங்கட்கிழமையில் வருவது இன்னும் கூடுதல் சிறப்பானதாகும். சோமவார பிரதோஷம் எனப்படுவது சிவ வழிபாட்டில் மிகவும் மகத்துவம் வாய்ந்ததாகும். பிரதோஷ விரதம், மாத சிவராத்திரி விரதம் இரண்டுமே சிறப்புக்குரியதாகும். இவை இரண்டும் ஒரே நாளில் வருவதால் இரு மடங்கு பலன் தரக் கூடிய சிறப்பான நாளாகும். இந்த நாளில் விரதம் இருந்து வழிபட்டால் வாழ்வில் ஏற்படும் தடைகளில் இருந்து விடுபட முடியும். பிறப்பு-இறப்பு சுழற்சியில் இருந்தும் விடுபட முடியும்.

சிவராத்திரி வழிபாடு மற்றும் முக்கியத்துவம்

சிவ-சக்தி ஐக்கியத்தின் அடையாளமாக போற்றப்படும் நாள் சிவராத்திரியாகும். தேய்பிறையில் வரும் சதுர்த்தசி நாளை மாத சிவராத்திரியாக கொண்டாடுகிறோம். இதுவே உலக உயிர்கள் தோன்றிய தினமாக கருதப்படுகிறது. இந்த நாளில் விரதம் இருந்து, தெய்வ அருளை பெறுவதற்கு ஏற்ற நாளாக குறிப்பிடப்படுகிறது. பிரதோஷம் மற்றும் மாத சிவராத்திரி இரண்டும் சிவனை வழிபட்டு, சிவனின் அருளை பெறுவதற்குரிய நாளாகும். இது திங்கட்கிழமையில் வரும் பிரதோஷம் என்பதால் சோமவார பிரதோஷம் என்கிறோம். இந்த நாளில் சிவன், சிவ வடிவங்களில் ஒன்றான தட்சிணாமூர்த்தி மற்றும் மங்கள கிரகமான குரு பகவான் ஆகியோரை வழிபடுவது மிகவும் ஏற்றது.