தட்டைப்பயறு: கருவுறுதலை ஊக்குவிக்கும் ஓர் அற்புத பயறு - டாக்டர் உஷாநந்தினி

கருவுறுதலுக்கு முயற்சிக்கும் பெண்களுக்கு தட்டைப்பயறு

கருவுறுதலுக்கு முயற்சிக்கும் போது உணவு முறையில் தினமும் பருப்பு பயறு வகைகள் சேர்ப்பதாக இருந்தால் நீங்கள் தட்டைப்பயறு சேர்க்கலாம். குறிப்பாக உடல் எடை அதிகமாக இருக்கும் பெண்கள் கருத்தரிக்க முயற்சிக்கும் போது, உடல் எடையும் குறைந்து, கருத்தரிக்கவும் முயற்சிக்க வேண்டும் என்றால் அவர்களுக்கு இந்த தட்டைப்பயறு பெரிதும் உதவும். இந்த தட்டைப்பயறை சுண்டலாக எடுத்துக்கொள்ளலாம் அல்லது சுரைக்காய் போன்ற காய்கறிகளுடன் சேர்த்து கூட்டு வடிவிலும் எடுத்துக்கொள்ளலாம் என்று சித்த மருத்துவர் உஷாநந்தினி பரிந்துரைக்கிறார்.

தட்டைப்பயறு: சிறுநீரகத்துக்கு நன்மை பயக்குமா?

புரதம் அதிகம் நிறைந்த உணவுகள் சிறுநீரகத்தை பாதிக்கும் என்பதால் பலருக்கும் இந்த குழப்பம் இருக்கும். ஆனால் தட்டைப்பயறு சிறுநீரகத்தின் செயல்பாட்டை மேம்படுத்தும். சிறுநீர்ப்பை செயல்பாட்டையும் மேம்படுத்தும். தட்டைப்பயறில் இருக்கும் ஆன்டி ஆக்ஸிடண்ட்கள் மற்றும் அத்தியாவசிய சத்துப்பொருள்கள் இருப்பதால் இது சிறுநீரகத்துக்கு நன்மை செய்யும். அதனால் இதில் உள்ள புரதம் சிறுநீரகத்தை பாதிக்கும் என்று கவலைப்பட வேண்டாம் என்கிறார் சித்த மருத்துவர் உஷாநந்தினி.

தட்டைப்பயறில் உள்ள ஊட்டச்சத்துக்கள்

தட்டைப்பயறில் உடலுக்கு வேண்டிய அத்தனை ஊட்டச்சத்துக்களையும் கொண்டுள்ளது. இவற்றில் வைட்டமின் ஏ, வைட்டமின் பி, வைட்டமின் சி, ஃபோலிக் ஆசிட், இரும்பு, கால்சியம், மெக்னீசியம், பாஸ்பரஸ், பொட்டாசியம் போன்ற சத்துக்களை உள்ளடக்கியுள்ளது. இந்த சத்துக்கள் அனைத்துமே உடல் ஆரோக்கியத்துக்கு அத்தியாவசியமானவை. எளிதாக கிடைக்கக்கூடியது என்பதோடு இதன் சுவையும் அதிகம் என்பதால் தினமும் ஒரு கப் சேர்த்து வருவது உடல் ஆரோக்கியத்துடன் உடல் எடையை நிர்வகிக்கவும் உதவும்.

தட்டைப்பயறு உடல் எடையை எப்படி குறைக்கிறது?

உடல் எடை குறைய முயற்சிப்பவர்கள் தட்டைப்பயறு தினமும் ஒரு கப் அளவு எடுத்து வந்தாலே உடல் எடை குறைவதை பார்க்கலாம். ஏனெனில் இதில் ஊட்டச்சத்துக்கள் அடங்கியிருக்கும் அதே நேரம் இது மிக குறைந்த கலோரியை கொண்டுள்ளது. சிக்கலான கார்போஹைட்ரேட் மற்றும் சிக்கலான புரதம் இதில் நிறைந்துள்ளது. 100 கிராம் அளவு சுண்டலில் சுமார் 120 கலோரி அளவு மட்டுமே கொண்டுள்ளது. உடல் எடை அதிகம் இருக்கும் பெண்கள் கருவுறுதலுக்கு முயற்சிக்கும் போது எடை குறையவும் உடலுக்கு வேண்டிய ஊட்டச்சத்துக்களை பெறவும் இந்த தட்டைப்பயறு சுண்டலை எடுத்துக்கொள்வதன் மூலம் கருவுறுதலை ஊக்குவிக்க முடியும் என்கிறார் சித்த மருத்துவர் உஷாநந்தினி.

தட்டைப்பயறு எப்படி சமைத்து சாப்பிடலாம்?

தட்டைப்பயறை பல வழிகளில் சுவையாக சமைத்து சாப்பிடலாம். அவற்றில் சில முக்கிய சமையல் குறிப்புகள் இங்கே:

தட்டைப்பயறு சுண்டல்:

• தட்டைப்பயறு - ஒரு கப்
• வெங்காயம் - 5 டீஸ்பூன் (நறுக்கியது)
• பச்சை மிளகாய் - காரத்துக்கேற்ப
• தாளிப்பு பொருள்கள் (கடுகு, வரமிளகாய், எண்ணெய்) - தேவைக்கு
• உப்பு - தேவைக்கு

தட்டைப்பயறை வெறும் வாணலியில் வறுத்து, பிறகு 30-60 நிமிடம் வரை தண்ணீரில் ஊறவிடவும். பிறகு குக்கரில் சேர்த்து வேண்டிய அளவு உப்பு சேர்த்து 3-5 விசில் வரை விட்டு இறக்கி வடிகட்டவும். தாளிப்பு பொருள்கள் சேர்த்து, பச்சை மிளகாய், வெங்காயம் சேர்த்து வதக்கி, இறுதியாக வேகவைத்த பயறை சேர்த்து இறக்கவும். சுவையான தட்டைப்பயறு சுண்டல் தயார். தேவையெனில் தேங்காய்ப்பூ சேர்த்துகொள்ளலாம்.

வேறு எப்படி சமைத்து சேர்க்கலாம்?

• தட்டைப்பயறை சுரைக்காய் உடன் சேர்த்து கூட்டு வைத்து சாப்பிடலாம்.
• குழம்பு வகைகளில் காராமணியை சேர்த்து சமைக்கலாம். காராமணி கத்தரிக்காய் குழம்பு பாரம்பரியமாக வெகு பிரசித்தமானது.
• சாலட்களில் இந்த பயறை சேர்த்து சாப்பிடலாம். ஊறவைத்து முளைகட்டி சுண்டலாகவும், சாலட் வடிவிலும், குழம்பிலும் சேர்த்து சாப்பிடலாம்.