108 மந்திர ஜபத்தின் மகத்துவம்

108ன் தெய்வீக முக்கியத்துவம்

ஒவ்வொரு மந்திரத்திற்கும் ஒரு குறிப்பிட்ட ஆற்றல் உண்டு. இவற்றை குறிப்பிட்ட எண்ணிக்கையில் மீண்டும் மீண்டும் உச்சரிக்கும் போது, அந்த மந்திரங்கள் உயிர் பெற்று, நமக்கு அளவில்லாத பலன்களை தருவதுடன், நமக்கு கவசம் போல் இருந்து காக்கும். இந்த மந்திர எண்ணிக்கை என்பது மந்திரங்கள் மற்றும் அது உச்சரிக்கப்படும் தெய்வத்தை பொறுத்து மாறுபடும். நாம் மந்திரங்களை உச்சரிக்கும் எண்ணிக்கைக்கு ஏற்ப பலன்களும் மாறுபடும்.

ஆனால் எந்த ஒரு மந்திரமாக இருந்தாலும் அதை 108 முறை சொல்லும் போது என்ன நினைத்து அந்த மந்திரத்தை உச்சரிக்கிறோமோ அதன் முழு பலனும் கிடைக்கும் என சொல்லப்படுகிறது. 108 முறை கோவிலை வலம் வருவது, 108 முறை மந்திர ஜபம் என்பது என்பது மிக உயர்வானதாக இந்து சாஸ்திரத்தில் கருதப்படுகிறது.

நவகிரகங்களும் 108ன் தொடர்பும்

'அது என்ன 108? இந்த எண்ணிற்கு மட்டும் ஏன் இத்தனை சிறப்பு?' என பலர் யோசிக்கலாம். 108 முறை மந்திரங்களை சொல்ல வேண்டும் என சொல்வதற்கு காரணம் தெரிந்தால், கண்டிப்பாக இனி எந்த மந்திரத்தையும் 108 முறை மட்டுமே சொல்லுவோம்.

ஒவ்வொரு மனிதனுடன் பிறப்பு முதல் இறப்பு வரையில் நடக்கும் ஒவ்வொரு செயல்பாடுகளும் நவகிரகங்களின் இயக்கத்தின் அடிப்படையிலேயே நடப்பதாக சொல்லப்படுகிறது. இந்த நவகிரகங்களின் இயக்கங்கள், நிலைகள் ஆகியவற்றை பொறுத்து தான் நம்முடைய வாழ்க்கையில் நடைபெறும் நன்மை, தீமைகள் அமையும் என சொல்லப்படுகிறது. அந்த வகையில் நவகிரகங்களின் இயக்கங்கள் சரி இல்லாத போது நமக்கு ஏற்படும் துன்பங்களில் இருந்து விடுபட மிக எளிமையான, அதே சமயம் சக்தி வாய்ந்த வழிபாடாக கருதப்படுவது 108 முறை மந்திர ஜபம் ஆகும்.

108 முறை ஜபம் செய்வதால் ஏற்படும் பலன்கள்

• ✓இந்து சாஸ்திர முறைகளின் படி கோள்கள் 9, ராசிகள் 12. நவகிரகங்கள் எனப்படும் 9 கோள்களும் 12 ராசிகளையும் ஒரு குறிப்பிட்ட கால இடைவெளியில் சுற்றி வந்து கொண்டே இருக்கின்றன.
• ✓இந்த நவகிரகங்களும் சுற்றி வரும் போது 108 வகையான மாற்றங்களை சந்திக்கின்றன.
• ✓இந்த இயக்கம் அல்லது சுழற்சியில் ஏதாவது ஒரு இடத்தில் குறை ஏற்பட்டிருந்தாலும் நமக்கு அந்த கோள்களின் இயக்கத்தால் எதிர்மறையான விளைவு ஏற்படும். இதனால் பலவிதமான துன்பங்களை நாம் அனுபவிக்க வேண்டி வரும்.
• ✓இப்படி தெரியாமல் நடக்கும் சிறிய குறைகளால் நமக்கு ஏற்படும் துன்பங்களில் இருந்து விடுபடுவதற்காக தான் மந்திரங்களை 108 உச்சரித்தால் உடனடியாக பலன் கிடைக்கும் என்கிறார்கள்.
• ✓நவகிரகங்களின் ஒரு சுற்றுக்கு ஒரு மந்திர எண்ணிக்கை என்ற அடிப்படையில் 108 முறை உச்சரிக்கப்படும் போது, அந்த குறைகள் சரி செய்யப்பட்டு, நமக்கு நவகோள்களால் நன்மைகள் கிடைக்க துவங்கும்.
• ✓அதோடு இறையருளும் பரிபூரணமாக கிடைக்கும். இதனால் தான் 108 முறை மந்திரங்களை உச்சரித்து வைக்கப்படும் கோரிக்கைகள் உடனடியாக நிறைவேறும் என்கிறார்கள்.
• ✓ஒரு மந்திரத்தை 108 முறை சொல்லும் போது அதற்கு தானாக பூரணத்துவம் என்ற தெய்வீக சக்தியை பெற்று விடுகிறது.

இது ஜோதிடம் மற்றும் ஆன்மீக நலன்களுக்கு மிகவும் உகந்த முறையாகும். முருகன் ஆலயங்களிலும், பிற தமிழ் தெய்வ வழிபாடுகளிலும் 108 என்ற எண் சிறப்பு முக்கியத்துவம் பெறுகிறது.