ஆடி அமாவாசை முன்னோர்கள் பூஜை: பித்ரு தோஷம் நீக்கும் வழிமுறைகள்

ஆடி அமாவாசை அன்று செய்ய வேண்டிய முக்கிய சடங்குகள்

ஆடி அமாவாசை நாளில் முன்னோர்களுக்குத் தர்ப்பணம் அளிப்பது மற்றும் பூஜை செய்வது மிக முக்கியம். இதை முறையாகச் செய்வதற்கான வழிமுறைகள் இங்கே கொடுக்கப்பட்டுள்ளன:

1. நீராடல் மற்றும் சுத்திகரிப்பு

• அதிகாலையிலேயே எழுந்து தலையில் எண்ணெய் தேய்க்காமல் குளிக்க வேண்டும்.
• முடிந்தால் புனித நதிகளிலோ அல்லது கடலிலோ புனித நீராடுவது மிகவும் விசேஷம்.
• இயலாதவர்கள் வீட்டிலேயே குளித்து சுத்தமான ஆடைகளை அணிய வேண்டும்.

2. தர்ப்பணம் அளிக்கும் முறை

தர்ப்பணம் என்பது முன்னோர்களின் ஆத்ம சாந்திக்காக அளிக்கப்படும் ஒரு சடங்கு. இது அமாவாசை அன்று செய்ய வேண்டிய மிக முக்கியமான சடங்கு ஆகும்.

• நீர்நிலைகளின் கரைகளுக்கு சென்றோ அல்லது வீட்டில் இருந்தபடியோ தர்ப்பணம் கொடுக்கலாம்.
• தேவையான பொருட்கள்: எள் (கருப்பு எள்), தண்ணீர், பச்சரிசி மாவு அல்லது சமைத்த சாதம் கலந்து செய்யப்பட்ட உருண்டைகள் (பிண்டம்), தர்ப்பைப் புல்.
• தர்ப்பணம் செய்ய முடியாதவர்கள் வீட்டிலேயே எள்ளும், தண்ணீரும் இறைத்து வழிபட வேண்டும்.
• முன்னோர்களின் பெயரை உச்சரித்து, அவர்களின் ஆத்மா சாந்தி அடைய பிரார்த்தனை செய்ய வேண்டும். மூன்று தலைமுறை முன்னோர்களின் பெயர்களைச் சொல்லி தர்ப்பணம் கொடுக்க வேண்டும்.
• காசி, கயா போன்ற தலங்களை மனதில் நினைத்து தர்ப்பணம் கொடுக்கலாம்.

3. தர்ப்பணம் அளிக்கும் நேரம்

சூரிய உதயத்திற்கு முன் தர்ப்பணம் கொடுக்கக் கூடாது. சூரியனை சாட்சியாக வைத்தே முன்னோர்களுக்குத் தர்ப்பணம் அளிக்க வேண்டும். சூரிய பகவான் தந்தை வழி உறவுகளுக்குக் காரணமானவர். அதனால் சூரியன் உதயமான பிறகே தர்ப்பணம் கொடுத்து, முன்னோர்கள் வழிபாட்டினைச் செய்ய வேண்டும்.

4. ஆடி அமாவாசை முன்னோர்கள் பூஜை செய்யும் முறை

• தெற்கு பார்த்தவாறு முன்னோர்கள் படத்தை வைத்து ஒரு அகல் விளக்கு ஏற்றி வைக்க வேண்டும். படம் இல்லாதவர்கள் ஒரு அகல் விளக்கை மட்டும் ஏற்றி வைத்து வழிபடலாம்.
• முன்னோர்கள் படத்திற்கு துளசி மாலை அணிவித்து சாம்பிராணி போட வேண்டும்.
• வெற்றிலை, பாக்கு, இரண்டு வாழைப்பழம், சிறிது மல்லிகைப்பூ வைத்து வழிபட வேண்டும்.
• நிறை சொம்பில் நீர் கண்டிப்பாக வைக்க வேண்டும்.
• படையலுக்கு வாழைக்காய் பொரியல், உளுந்து வடை கண்டிப்பாக வைக்க வேண்டும்.
• விரதம் இருந்து, வெள்ளை வேஷ்டி அணிந்து ஆண்கள் தான் பூஜை செய்ய வேண்டும்.

5. தான தர்மங்கள்

• காக்கைக்கு கிழக்கு திசை பார்த்து உணவு வைத்து பிறகு சிறிது நீர் விலவ வேண்டும்.
• அகத்திக்கீரை, பசு மாட்டிற்கு தானமாக கொடுக்க வேண்டும். வெல்லம் கலந்த பச்சரிசி, வாழைப்பழத்துடன் சேர்த்தும் கொடுப்பது சிறப்பு.
• ஆடி அமாவாசை அன்று முன்னோர்களை வழிபடுவதுடன் தானம் அளிப்பது மிக மிக சிறப்பானது.
• யாருக்காவது அன்னதானம் அளிக்கலாம். இதனால் ஜாதகத்தில் பித்ரு தோஷம் இருந்தால், அதன் தாக்கம் பெருமளவு குறையும்.

6. மாலை நேர வழிபாடு

• மாலை 6 மணிக்கு மேல் அருகிலுள்ள கோவிலுக்குச் சென்று, ஒரு நெய் தீபம் முன்னோர்களை நினைத்து ஏற்ற வேண்டும்.
• சிவன் கோவிலுக்கு சென்று வழிபடலாம். மந்திர ஜபம் செய்யலாம்.