பிறந்து ஒரு வயதுக்குப் பிறகு வயதாகும் வரைக்கும் நம்முடைய பற்களின் உதவியால் தான் சாப்பிடுகிறோம். அதுமட்டுமல்ல, பற்கள் நம் உடல் செயல்பாட்டில் நமக்கே தெரியாமல் நிறைய வேலைகளைச் செய்கிறது. மூளையின் செயல்பாடு வரைக்கும் பற்களுக்கு பங்கு உண்டு. அப்பேர்ப்பட்ட பற்களை நாம் எப்படி பார்த்துக்கணும்? அதுக்கு தான் இந்த டிப்ஸ்.
1. பல் உறுதியாக கிராம்பு
கிராம்பு பல் சார்ந்த பிரச்சினைக்கு மிக அற்புதமான வீட்டு வைத்தியமாக செயல்படும். காலங்காலமாக பல் வலி பிரச்சினைக்கு கிராம்பும் கிராம்பு எண்ணெயும் தான் மருந்தாக (வீட்டு வைத்தியமாக) நம் முன்னோர்கள் பயன்படுத்தி வருகிறார்கள். ஆயுர்வேதமும் அதையே அறிவுறுத்துகிறது. தினமும் காலை அல்லது மாலையில் 300 மில்லி தண்ணீரில் 4-5 கிராம்பைக் கொதிக்க வைத்து அந்த நீரை தினமும் குடித்து வந்தாலே பெரும்பாலான பல் சம்பந்தப்பட்ட பிரச்சினைகள் தீரும்.
2. மஞ்சள் - ஆயில் பேஸ்ட்
மஞ்சளில் அழற்சி எதிர்ப்பு பண்புகள் அதிகமாக இருக்கின்றன. அதோடு இதிலிருக்கும் ஆன்டி பாக்டீரியல் மற்றும் ஆன்டி வைரல் பண்புகள் அதிகமாக இருக்கின்றன. மஞ்சளை பற்களில் அப்ளை செய்தால் பற்கள் மஞ்சள் கறை ஆகிவிடும் என்று நீங்கள் நினைக்கலாம். கடுகு எண்ணெய் சிறிதளவு எடுத்து அதில் மஞ்சள் சேர்த்து குழைத்துக் கொள்ளுங்கள். அதை பல் துலக்கிய பிறகு கைகளால் அல்லது அதே பிரஷ்ஷால் எடுத்து பற்களில் தேய்த்து துலக்க வேண்டும். இப்படி செய்வதன் மூலம் பற்களில் கிருமிகள் தொற்று ஏற்படுவது குறையும். ஏற்கனவே புழுக்கள் மற்றும் பாக்டீரியா தொற்றுக்கள் இருந்தால் அதுவும் சரியாகும்.
3. உப்பு நீர் கரைசல்
தொண்டை வலியை சீர் செய்வதற்கு மட்டுமின்றி வாய் சுகாதாரத்திலும் உப்பு நீர் கரைசலுக்கு முக்கியப் பங்கு இருக்கிறது. உப்பு நீர்க் கரைசல் மிகச்சிறந்த கிருமி நாசினியாகச் செயல்படுகிறது. இது வாயில் உள்ள பாக்டீரியாக்களைக் கொல்லும். பல் வலியில் இருந்து தீர்வு தரும். தினமும் காலை எழுந்ததும் ஒரு டம்ளர் வெதுவெதுப்பான நீரில் அரை ஸ்பூன் அளவு உப்பு சேர்த்துக் கலந்து கொள்ளுங்கள். 2-3 முறை வாயில் ஊற்றி நன்கு வாய் கொப்பளிக்க வேண்டும். இப்படி செய்யும்போது பற்களின் இடுக்குகளில் இருக்கும் அழுக்குகள், கறைகள் மட்டுமல்லாது, ஈறுகளில் ஏற்படும் வீக்கம் ஆகியவையும் குறையும்.
4. இஞ்சியும் எலுமிச்சையும்
இஞ்சி சாறு மற்றும் எலுமிச்சை சாறு ஆகிய இரண்டும் சேர்த்து பயன்படுத்தும் போது பல் சார்ந்த பல பிரச்சினைகள் தீரும். பல் மற்றும் வாயில் ஏதேனும் தொற்றுக்கள் இருந்தாலும் சரியாகும். ஒரு ஸ்பூன் இஞ்சி சாறை எடுத்து அதில் ஒரு ஸ்பூன் எலுமிச்சை சாறு சேர்த்துக் கலந்து மிக்ஸ் செய்து கொள்ளுங்கள். இந்த கலவையை உங்கள் பற்களின் மீது தடவி 15 நிமிடங்கள் வரை அப்படியே வைத்திருங்கள். பிறகு கைகளில் தேய்த்து துலக்கி பின்பு வாயைக் கொப்பளித்துக் கொள்ளுங்கள்.
5. உப்பும் மஞ்சளும்
மஞ்சள் மற்றும் உப்பு ஆகிய இரண்டுமே பல் மற்றும் ஈறுகளில் ஏற்படும் வலி மற்றும் வீக்கத்தைக் குறைக்க உதவி செய்யும். குறிப்பாக ஈறு சம்பந்தப்பட்ட பிரச்சினைகளைச் சரிசெய்ய உப்பும் மஞ்சளும் மிகச்சிறந்த வீட்டு வைத்தியமாக இருக்கும். இதற்கு கல் உப்பு பயன்படுத்துவது தான் சிறந்தது. கல் உப்பை பொடி செய்து அதில் மஞ்சள் பொடி சேர்த்து மிக்ஸ் செய்து கொள்ளுங்கள். தினமும் இரவு தூங்கச் செல்லும்முன் அந்த பொடியில் பல் துலக்கி வர சொத்தைப் பல் மற்றும் அவற்றில் உள்ள புழுக்கள் ஆகியவை நீங்கும். ஈறுகளில் ரத்தம் வடிவதும் நிற்கும்.
6. ஆலங்குச்சி, வேலங்குச்சி, வேம்பு
ஆலும் வேலும் பல்லுக்குறுதி என்று சொல்வார்கள். ஆலங்குச்சி மற்றும் வேலங்குச்சி ஆகியவற்றோடு வேப்பங்குச்சியையும் சேர்த்துக் கொள்ளலாம். டூத் பிரஷ்க்கு பதிலாக இந்த மூன்று வகை குச்சிகளில் எது கிடைக்கிறதோ அதை பயன்படுத்தி பல் துலக்கலாம். அதிலுள்ள கசப்புத் தன்மை பற்களில் உள்ள புழுக்களை கொல்லும். இதில் பாக்டீரியா மற்றும் அழற்சி எதிர்ப்பு பண்புகளும் இருக்கின்றன. அதோடு பல் சிதைவு மற்றும் துர்நாற்றத்தில் இருந்தும் பற்களைப் பாதுகாக்கும்.
7. பற்களை வலிமையாக்கும் பூண்டு
பூண்டில் இருக்கும் அல்லிசின் உள்ளிட்ட சேர்மங்கள் பல் சிதைவை ஏற்படுத்தக்கூடிய பாக்டீரியாக்களைத் தாக்கி அழிக்கும். பூண்டு பற்களை நசுக்கி அதில் சிறிது மஞ்சளை சேர்த்துக் குழைத்து அந்த பேஸ்ட்டை வலி உள்ள இடத்தில் அப்ளை செய்து தேய்த்து விடுங்கள். இது பல் வலியையும் குறைக்கும். கிருமிகளையும் கொல்லும்.
முக்கிய குறிப்புகள்
உங்கள் பற்கள் மற்றும் ஈறுகளின் ஆரோக்கியத்தை மேம்படுத்த இந்த எளிய வீட்டு வைத்தியங்கள் உதவும்:
- தினமும் கிராம்பு நீரை குடிப்பது பல் பிரச்சனைகளை குறைக்கும்.
- கடுகு எண்ணெய் மற்றும் மஞ்சள் கலவை கிருமி தொற்றை நீக்கும்.
- உப்பு நீர் கரைசலை கொண்டு வாய் கொப்பளிப்பது வாய் சுகாதாரத்தை மேம்படுத்தும்.
- இஞ்சி மற்றும் எலுமிச்சை சாறு பல் தொற்றுகளை சரிசெய்யும்.
- கல் உப்பு மற்றும் மஞ்சள் தூள் கலவை ஈறு வீக்கம் மற்றும் இரத்தப்போக்கை சரிசெய்யும்.
- ஆலங்குச்சி, வேலங்குச்சி, வேப்பங்குச்சி ஆகியவை பற்களை வலுப்படுத்தும்.
- பூண்டு மற்றும் மஞ்சள் பேஸ்ட் பல் வலியைக் குறைக்கும் மற்றும் கிருமிகளை அழிக்கும்.
அடிக்கடி கேட்கப்படும் கேள்விகள்
இறுதியாக, மேலே குறிப்பிட்ட இந்த எளிமையான வீட்டு வைத்தியங்களைப் பயன்படுத்தி உங்கள் பற்களை நுண் கிருமிகள், பாக்டீரியாக்கள், பூஞ்சைத் தொற்றுக்களில் இருந்து பாதுகாத்துக் கொள்ளுங்கள். அதோடு பல் சொத்தை, ஈறு சார்ந்த பிரச்சினைகளையும் சரிசெய்யும்.