இந்து சமயத்தில் ஒவ்வொரு தெய்வத்திற்கும் ஒரு விலங்கு அல்லது பறவை வாகனமாக குறிப்பிடப்படுகிறது. இந்த பிரபஞ்சத்தில் கால சக்கரத்தை இயக்கும் காலபைரவர் பெருமானுக்கு நாய்கள் வாகனமாக திகழ்கின்றன. இதன் காரணமாக நாய்களை பைரவரின் வடிவமாக கருதி வழிபடும் பழக்கம் பலருக்கும் உள்ளது. பைரவரின் அருள் பெற நாய்களுக்கு உணவளிப்பது ஒரு முக்கியமான பரிகாரம் மற்றும் வழிபாடாக பார்க்கப்படுகிறது.
காலபைரவர் யார்?
பைரவர், சிவபெருமானின் 64 வடிவங்களில் ஒன்றாக கருதப்படுகிறார். சிவபெருமானின் ருத்ர வடிவமாகவும் இவர் போற்றப்படுகிறார். சிவ வழிபாட்டில் நந்திக்கு எப்படி முக்கிய பங்கு கொடுக்கப்படுகிறதோ, அதே போன்று சிவாலயங்களில் காலபைரவருக்கு அதிக முக்கியத்துவம் கொடுக்கப்படுகிறது. இவரே அனைத்து சிவாலயங்களிலும், ஆன்மீக நகரான காசியிலும் காவல் தெய்வமாக இருந்து காப்பதாக சொல்லப்படுகிறது. மேலும், காலத்தை நிர்ணயிக்கும் தெய்வமாகவும் காலபைரவர் போற்றப்படுகிறார். கடுமையான துன்பங்களில் தவிப்பவர்கள் தங்களின் நிலை மாற பைரவரை ஞாயிற்றுக்கிழமை ராகு காலத்தில் வழிபடுவது வழக்கம்.
பைரவரின் நாய் வாகனம் ஏன்?
பைரவருக்கு நாய்களை வாகனமாக குறிப்பிடுவதற்கு மிக முக்கியமான ஆன்மீக காரணம் உள்ளது. கால சக்கரத்தை இயக்கும் சக்தி படைத்தவர் காலபைரவர். காலை, மாலை, இரவு, பகல் என அனைத்து நேரங்களிலும் நவகிரகங்கள், எட்டு திசைகள், 12 ராசிகள், 27 நட்சத்திரங்கள் ஆகியவற்றை இயக்குபவராகவும் காலபைரவர் குறிப்பிடப்படுகிறார். எப்போதுமே ஒரே இடத்தில் நிற்காமல், கிரகங்களை போல் சுழன்றுக் கொண்டும், மாறி மாறி இங்கும் அங்கும் சென்று கொண்டும் இருப்பவர் பைரவர். ஒரு விசுவாசமான காவலாளியைப் போன்று, நாய்களும் இரவில் இங்கும் அங்கும் சென்று காவல் காப்பதால் நாயை தன்னுடைய வாகனமாக பைரவர் வைத்துள்ளார் என ஆன்மீக நூல்கள் கூறுகின்றன. இதனால்தான் இரவில் கோவிலை பூட்டிய பிறகு எந்த ஆலயத்தையும் மீண்டும் திறக்க மாட்டார்கள். கோவிலை பூட்டிய பிறகு கோவிலுக்குள் பைரவர் உள்ளிட்ட காவல் தெய்வங்கள் உலா வருவதாகவும், காவல் காப்பதாகவும் ஐதீகம்.
காலபைரவர் வழிபாட்டின் பலன்கள்
காலபைரவரை வழிபடுவது பல்வேறு துன்பங்களில் இருந்து விடுதலை அளிக்கும். குறிப்பாக:
- விபத்துக்கள், வம்பு வழக்குகளில் சிக்குபவர்கள், எதிரிகள் தொல்லையால் அவதிப்படுபவர்கள் வெளியில் புறப்படும் போது நாய்களுக்கு உணவளித்து விட்டு சென்றால், பைரவர் துணையாக கூடவே வந்து, எந்த ஆபத்தும் நெருங்காமல் காப்பார் என்ற நம்பிக்கை உள்ளது.
- சிவன் கோவில்களுக்கு மட்டுமின்றி சிவ பக்தர்களுக்கும் பைரவர் காவலாக இருந்து காக்கக் கூடியவர். இதனாலேயே சதுரகிரி, திருவண்ணாமலை போன்ற சில சிவன் கோவில்களுக்கு செல்லும் போது நடந்து செல்லும் பக்தர்களுடன் ஒரு நாயை துணையாக வருவதை பல பக்தர்கள் தங்கள் வாழ்வில் கண்ட அனுபவமாக குறிப்பிடுகின்றனர்.
- கடன் பிரச்சனை, நவகிரக தோஷம் போன்றவற்றால் பெரும் துன்பங்களை அனுபவிப்பவர்கள் பைரவருக்கு தேய்பிறை அஷ்டமியில் விளக்கேற்றி வழிபடுவது நல்ல பலனை தரும்.
- குறிப்பாக கார்த்திகை மாதத்தில் வரும் தேய்பிறை அஷ்டமியில் காலபைரவரை வழிபட்டால் தீராத எப்பேர்ப்பட்ட துன்பமாக இருந்தாலும் அது தீர்ந்து விடும் என்ற ஆழ்ந்த நம்பிக்கை பக்தர்களிடம் உள்ளது. இது ஒரு சிறந்த பரிகாரமாக செயல்படுகிறது.
காலபைரவர் வழிபாடு மூலம் ஏற்படும் நன்மைகள், நமது ஜோதிட ரீதியான பிரச்சனைகளை தீர்க்கவும், வாழ்க்கை தடைகளை நீக்கவும் உதவுகிறது.