சரும அரிப்பு என்பது சங்கடமான மற்றும் எரிச்சலூட்டும் ஒரு தோல் நிலை. இதனால் தூக்கமின்மை மற்றும் பதட்டம் போன்ற பிரச்சனைகள் ஏற்படும். இந்த அரிப்பினால் தோலில் ஏற்படும் சிறிய வெடிப்புகள் தொற்றுக்கு வழிவகுக்கும் என்பதால், அரிப்பு உடனடியாக கவனிக்கப்பட வேண்டிய சரும பராமரிப்பு ஆகும். அரிப்பிலிருந்து விடுபட பல இயற்கை மற்றும் வீட்டு வைத்தியங்கள் உள்ளன. ஆறு வாரங்களுக்கு மேல் அரிப்பு நீடித்தால், அது நாள்பட்ட pruritus ஆக இருக்கலாம். இந்நிலையில் சரும பராமரிப்பு மருத்துவரை அணுகுவது நல்லது. சரும அரிப்புக்கு உதவும் வீட்டு வைத்தியங்கள் என்ன என்பதை இங்கு விரிவாகப் பார்க்கலாம்.
சரும அரிப்பை சரி செய்யும் இயற்கை மற்றும் வீட்டு வைத்தியங்கள்
தேங்காய் எண்ணெய்
தேங்காய் எண்ணெய் சருமத்திற்கு மிகவும் நல்லது. இது முகம் மற்றும் உடல் முழுவதும் ஏற்படும் நமைச்சல் மற்றும் அரிப்புக்கு சிறந்த தீர்வு. அரிப்பு பிரச்சனை இருந்தால் குளிப்பதற்கு முன்பு முகம், கை, கால்கள் மற்றும் கழுத்தில் தேங்காய் எண்ணெய் தடவி, அரை மணி நேரம் கழித்து குளித்தால் சரும அரிப்பு குறையும். தேங்கெண்ணெய் எளிதாகக் கிடைக்கக்கூடிய பொருள் என்பதோடு பாதிப்பும் ஏற்படுத்தாது.
புதினா எண்ணெய்
புதினா குடும்பத்தைச் சேர்ந்த தாவரங்களில் இருந்து எடுக்கப்படும் அத்தியாவசிய எண்ணெய், சருமத்திற்கு குளிர்ச்சியை அளிக்கிறது. வலியையும் அரிப்பையும் குறைக்க உதவுகிறது. ஒரு பழைய ஆய்வில், புதினா எண்ணெய் அரிப்பு தோலுக்கு நல்லது என்று கண்டறியப்பட்டது. இந்த எண்ணெயை தனித்து பயன்படுத்தாமல் கெரியர் எண்ணெய் உடன் சேர்த்து பயன்படுத்த வேண்டும்.
ஐஸ் கட்டி சிகிச்சை
American Academy of Dermatology (AAD) அரிப்பு தோலுக்கு குளிர்ச்சியான ஈரமான துணி அல்லது ஐஸ் கட்டியை பயன்படுத்த பரிந்துரைக்கிறது. குளிர்ச்சி, அரிப்புக்கு காரணமான வீக்கத்தை குறைக்க உதவுகிறது. ஐஸ் கட்டியை நேரடியாக சருமத்தின் மீது வைக்காமல் துணியில் போர்த்தி வைத்து எடுக்கலாம். இது சருமத்துக்கு கூடுதல் குளிர்ச்சியை அளிக்கும்.
ஓட்ஸ் (Oatmeal)
கூழ் ஓட்ஸ் என்பது நன்றாக அரைக்கப்பட்ட ஓட்ஸ் ஆகும். இதை தண்ணீரில் கரைத்து பயன்படுத்தலாம். இந்த கரைசல் சருமத்தின் மேற்பரப்பில் ஒரு பாதுகாப்பு அடுக்கை உருவாக்குகிறது, ஈரப்பதத்தை தக்க வைக்க உதவுகிறது. கூழ் ஓட்ஸ், சரும வறட்சி மற்றும் அரிப்பிலிருந்து நிவாரணம் அளிக்கிறது. கூழ் ஓட்ஸில் ஆன்டிஆக்ஸிடன்ட் மற்றும் அழற்சி எதிர்ப்பு பண்புகள் உள்ளன.
பேக்கிங் சோடா
பேக்கிங் சோடாவில் பூஞ்சை எதிர்ப்பு பண்புகள் உள்ளன. இது பல பூஞ்சை தோல் நோய்களுக்கு சிகிச்சையளிக்க உதவுகிறது. ஒரு கப் வெதுவெதுப்பான நீரில் கால் கப் பேக்கிங் சோடாவை சேர்க்கலாம். அல்லது, பேக்கிங் சோடாவை சிறிது தண்ணீரில் கலந்து பேஸ்ட் செய்து அரிப்பு உள்ள இடங்களில் தடவி பிறகு மந்தமான நீரில் குளிப்பது அரிப்பை கட்டுப்படுத்த உதவும்.
துளசி இலைகள்
துளசி இலைகளில் மருத்துவ குணங்கள் உள்ளன. அவை சரும அரிப்பைத் தடுக்க உதவுகின்றன. ஒரு கைப்பிடி துளசி இலைகளை எடுத்து, நீரில் அலசி, சிறிதளவு தண்ணீர் சேர்த்து அரைத்து, இந்த கலவையை முகம், கழுத்து மற்றும் கைகளில் தடவலாம். துளசியின் குளிர்ச்சியான பண்புகள் சரும அரிப்பை நீக்கும். துளசி பாக்டீரியா எதிர்ப்பு தன்மை கொண்டது.
ஆப்பிள் சீடர் வினிகர்
ஆப்பிள் சைடர் வினிகரில் ஆன்டி மைக்ரோபியல் மற்றும் அலர்ஜி எதிர்ப்பு பண்புகள் உள்ளன. இவை தொற்றுநோய்களைத் தடுக்க உதவும். உடலில் ஆங்காங்கே அரிப்பு பிரச்சனை எதிர்கொண்டால் குளிக்கும் போது தண்ணீரில் சிறிதளவு ஆப்பிள் சைடர் வினிகர் சேர்க்கலாம். அல்லது ஒரு டம்ளர் நீரில் ஆப்பிள் சைடர் வினிகர் சேர்த்து, அதை காட்டன் துணியில் நனைத்து அரிப்பு இருக்கும் இடத்தில் தடவி வந்தால் அரிப்பு கட்டுப்படும்.
மாய்ஸ்சரைசிங் க்ரீம்கள்
மாய்ஸ்சரைசர்கள் சருமத்தின் வெளிப்புற அடுக்கை ஈரப்பதமாக்க உதவுகின்றன. அரிப்பு மற்றும் வறட்சியை ஏற்படுத்தும் தோல் நோய்களை நிர்வகிக்க இவை அவசியம். ஒரு நல்ல மாய்ஸ்சரைசரில் ஈரப்பதமூட்டிகள் இருக்க வேண்டும். இவை சருமத்தின் மேற்பரப்பில் ஒரு பாதுகாப்பு படலத்தை உருவாக்கி, ஈரப்பதத்தை தக்க வைக்க உதவுகின்றன. குளித்த அல்லது ஷவர் செய்த உடனேயே மாய்ஸ்சரைசர்களைப் பயன்படுத்துவது நல்லது.
சரும அரிப்பு இருக்கும் போது தடுக்க வேண்டியவை
- வெந்நீர்: வெந்நீர் சருமத்தில் இருந்து ஈரப்பதத்தை நீக்குகிறது. இதனால் சருமம் வறண்டு, சிவந்து அரிப்பு ஏற்படும். குளிக்கும் நீரின் வெப்பநிலையை குறைப்பது நல்லது.
- வெப்பநிலை மற்றும் ஈரப்பதம் மாற்றங்கள்: தீவிர வெப்பநிலை மற்றும் ஈரப்பதம் மாற்றங்கள் சருமத்தை உலரச் செய்து, அரிப்பை ஏற்படுத்தும். ஈரப்பதமூட்டி (Humidifier) வறண்ட கோடை மாதங்களில் அறை ஈரப்பதத்தை பராமரிக்க உதவும்.
- வாசனை திரவியங்கள் கலந்த தோல் பராமரிப்பு பொருட்கள்: சில தோல் பராமரிப்பு பொருட்களில் வாசனை திரவியங்கள் மற்றும் செயற்கை வண்ணங்கள் சேர்க்கப்படுகின்றன. இவை சரும எரிச்சலை ஏற்படுத்தலாம். அரிப்பு அல்லது உணர்திறன் வாய்ந்த சருமம் உள்ளவர்கள் வாசனை மற்றும் சாயங்கள் இல்லாத தோல் பராமரிப்பு பொருட்களை பயன்படுத்த வேண்டும்.
- தளர்வான ஆடைகள்: அரிப்பு உள்ளவர்கள் தளர்வான பருத்தி ஆடைகளை அணியலாம். பருத்தி சருமத்தை சுவாசிக்க அனுமதித்து அதிக வெப்பமடைவதை தடுக்கிறது.
- மன அழுத்தம்: மன அழுத்தம் அரிப்பை அதிகரிக்கும் என்று ஆய்வுகள் காட்டுகின்றன. மன அழுத்தத்தை குறைக்கும் யோகா மற்றும் தியானம் போன்றவற்றை பயிற்சி செய்யலாம்.
சரும அரிப்புக்கு மருத்துவரை அணுக வேண்டுமா?
அரிப்பு 2 வாரங்களுக்கு மேல் நீடித்தால் மருத்துவரை அணுக வேண்டியிருக்கலாம். மேலும் அரிப்புடன் சொறி, கட்டிகள் இருந்தால், வீக்கம், சீழ் இருந்தால் உடனடியாக மருத்துவரை அணுக வேண்டும்.
அடிக்கடி கேட்கப்படும் கேள்விகள் (FAQ)
பொறுப்பு துறப்பு: இந்த கட்டுரையில் வழங்கப்பட்டுள்ள தகவல்கள் பொதுவான நோக்கங்களுக்காக மட்டுமே. மருத்துவ ஆலோசனை, நோயறிதல் அல்லது சிகிச்சைக்கு மாற்றாக இல்லை. மேலும் விவரங்களுக்கு எப்போதும் மருத்துவரை அணுகவும்.