பித்தப்பை கற்களுக்கு ஆலிவ் எண்ணெய் மற்றும் எலுமிச்சை சாறு: உண்மை என்ன?

மருத்துவர் கூறும் உண்மை

ஹைதராபாத்தில் உள்ள சாரதா ஹாஸ்பிடல்ஸின் மூத்த மருத்துவர் டாக்டர் ஸ்ரேய் குமார் ஸ்ரீவஸ்தவ் அவர்கள், ஆலிவ் எண்ணெயுடன் எலுமிச்சை சாறு கலந்து எடுத்துக்கொள்வதால் பித்தப்பை கற்கள் கரையும் என்பது வெறும் கட்டுக்கதையே என்று தெளிவாகக் கூறியுள்ளார். பித்தப்பையில் உருவாகும் கற்கள் திடமான, அடர்த்தியான கொழுப்பை அடிப்படையாகக் கொண்ட படிவங்கள். இவை எளிதில் கரையவோ, பித்தப்பையில் உள்ள நாளங்கள் வழியாக வெளியேறவோ முடியாது.

ஆலிவ் எண்ணெய் பித்த நீரின் உற்பத்தியைத் தூண்டி பித்தப்பையில் சுருக்கங்களை ஏற்படுத்தக்கூடும். எலுமிச்சை சாறு கல்லீரலின் செயல்பாட்டையும் செரிமானத்தையும் மேம்படுத்தக்கூடும். இவையிரண்டும் தற்காலிகமாக டீடாக்ஸ் செய்யுமே தவிர, பித்தப்பை கற்களைக் கரைக்கவோ, வெளியேற்றவோ செய்யாது. குறிப்பாக, கற்களின் அளவு பெரிதாக இருக்கும்போது இந்த கலவை மூலம் சுருக்கத்தை ஏற்படுத்தினால் வலி அல்லது அடைப்பை ஏற்படுத்தக்கூடும்.

மருத்துவரின் மேற்பார்வை இல்லாமல் இது போன்ற சுய சிகிச்சைகள் எடுத்துக்கொள்வது ஆபத்தானது. இந்த வீட்டு வைத்தியம் பித்தப்பை கற்களை நீக்கும் என்பதற்கான எந்தவித மருத்துவ ஆதாரங்களும் இல்லை.