சிவபெருமானின் அருளைப் பெற கடைபிடிக்கப்படும் பிரதோஷ விரதம் மகத்தான பலன்களைத் தரக்கூடியது. ஆனால், இந்த புனித நாளில் சில செயல்களைத் தவிர்ப்பதன் மூலம் சிவனின் கடுமையான கோபத்தில் இருந்து நாம் தப்பிக்க முடியும். ஜோதிடம் ரீதியாகவும், ஆன்மீக ரீதியாகவும் பிரதோஷ விரதத்தின் முக்கியத்துவத்தையும், அன்று செய்யக்கூடாத 5 முக்கிய விஷயங்களையும் இங்கு விரிவாகக் காணலாம்.
பிரதோஷ விரதத்தின் சிறப்பு
பிரதோஷ விரதம் என்பது சிவபெருமானின் அருளைப் பெறுவதற்காகக் கடைபிடிக்கப்படும் அஷ்ட விரதங்களில் ஒன்றாகும். இந்த நாளில் சிவ பூஜை செய்தும், சிவ மந்திரங்களைச் சொல்லியும் சிவனின் மனதைக் குளிர்விக்க வேண்டும். இதன் மூலம் அளவில்லாத நன்மைகளும், சிவனின் அருளும் பரிபூரணமாகக் கிடைக்கும். சிவபெருமானுக்கு அர்ப்பணிக்கப்பட்ட இந்த விரதத்தின் போது, அவருக்குப் பிடிக்காத விஷயங்களைச் செய்வதைத் தவிர்க்க வேண்டும். அதிலும் குறிப்பாக 5 விஷயங்களைச் செய்யாமல் தவிர்ப்பதால் சிவபெருமானின் கடுமையான கோபத்தில் இருந்து தப்பிக்க முடியும்.
2025 ஆம் ஆண்டில் மே மாதம் 24 ஆம் தேதி சனி பிரதோஷ விரதம் கடைபிடிக்கப்படுகிறது. பிரதோஷ விரதம் என்பது சிவனுக்கும், பார்வதி தேவிக்கும் உகந்த விரதம் ஆகும். இது கிருஷ்ண பக்ஷம் மற்றும் சுக்ல பக்ஷம் ஆகிய இரண்டு திரயோதசி திதிகளிலும் (13வது நாள்) மாதத்திற்கு இரண்டு முறை வருகிறது. 'பிரதோஷம்' என்றால் 'அந்தி சாயும் நேரம்' என்று பொருள். இந்த நேரத்தில் விரதம் அனுஷ்டிக்கப்படுகிறது. இந்த நாளில் சிவபெருமானும், பார்வதி தேவியும் மிகவும் மகிழ்ச்சியாக இருப்பதாகவும், பக்தர்களுக்கு அருள்பாலிப்பதாகவும் நம்பப்படுகிறது.
பிரதோஷ விரதத்தன்று தவிர்க்க வேண்டிய 5 முக்கிய விஷயங்கள்
பக்தர்கள் மிகுந்த பக்தியுடன் பூஜைகள் செய்து, ஆன்மீக வளர்ச்சி, அமைதி மற்றும் தங்கள் விருப்பங்கள் நிறைவேற சிவபெருமானை பிரார்த்தனை செய்கிறார்கள். ஆனால் நாம் அறியாமல் செய்யும் சில செயல்கள் சிவபெருமானை கோபப்படுத்தலாம். இதனால் நன்மைகள் நடப்பதற்குப் பதிலாக எதிர்மறை விளைவுகள் ஏற்படவும் வாய்ப்பு உள்ளது. எனவே, பின்வரும் 5 விஷயங்களை கண்டிப்பாகத் தவிர்க்க வேண்டும்:
1. பிறர் பொருளை அபகரித்தல்
பிறர் செல்வத்தை தவறாகப் பயன்படுத்துவதை சிவபெருமான் ஒருபோதும் ஏற்க மாட்டார். ஒருவர் உங்களை நம்பி கொடுத்த பணத்தை, உங்களின் சொந்த தேவைக்காகப் பயன்படுத்துவது மிகப்பெரிய தவறு. இதை சிவபெருமான் மன்னிக்க மாட்டார். மற்றவர்களிடம் பணம் பெற வேண்டும் என்று நினைப்பது அல்லது தனது கடனைச் செலுத்த முடியாமல் போனால் அவர் கோபம் கொள்கிறார். ஒருவர் மற்றவர்களின் சொத்து மற்றும் நிதி கடமைகளை மதிப்பது அவசியம். அப்போதுதான் வாழ்க்கையில் ஆன்மீகமும், செழிப்பும் நிலைத்திருக்கும் என்கிறது சாஸ்திரம்.
2. திருமண வாழ்க்கையில் குறுக்கிடுதல்
ஒருவரின் திருமண வாழ்க்கையில் பிரச்சனைகளை ஏற்படுத்துவது சிவபெருமானுக்குப் பிடிக்காத ஒன்றாகும். அடுத்தவர் குடும்பத்தில், அவர்களின் திருமண வாழ்க்கையில் பிரச்சனை ஏற்படும் வகையில், அவர்களின் மகிழ்ச்சியைக் கெடுக்கும் வகையில் நடந்து கொள்ளக் கூடாது. திருமண உறவுகளிடம் மரியாதையுடன் நடந்து கொள்வது சிவபெருமானின் தூய்மை மற்றும் நேர்மைக்கு எடுத்துக்காட்டாக விளங்குகிறது. இதன் மூலம் அவரது தயவையும், பாதுகாப்பையும் பெறலாம்.
3. மற்றவர்களுக்குத் தீங்கு நினைத்தல்
மற்றவர்களுக்குத் தீங்கு விளைவிப்பதை சிவபெருமான் விரும்புவதில்லை. தீமையைச் செய்வதை விட, நல்லதைச் செய்ய முயற்சி செய்யுங்கள். மற்றவர்களின் மகிழ்ச்சியைக் கெடுக்கும் எண்ணங்களைத் தவிர்க்க வேண்டும் என்கிறது சாஸ்திரம். கருணை மற்றும் இரக்கத்துடன் இருப்பது சிவபெருமானின் அருளைப் பெற உதவும். ஒருவரின் கவனத்தைத் திசை திருப்பி, அவரை குழப்பத்திற்கு ஆளாக்குவதும் தீங்கு செய்வதற்குச் சமம்.
4. சமூக விரோத செயல்களில் ஈடுபடுதல்
சமூக விரோத செயல்களில் ஈடுபடுபவர்களை சிவபெருமான் தண்டிப்பார். வன்முறை மற்றும் மற்றவர்களைத் துன்புறுத்துவது போன்ற செயல்களை அவர் வெறுக்கிறார். நல்லொழுக்கத்துடன் வாழ்வது மற்றும் சமூகத்திற்கு நன்மை செய்வது போன்ற செயல்கள் சிவபெருமானின் ஆசியைப் பெற்றுத் தரும். நம்மைச் சுற்றி இருப்பவர்களிடம் காட்டும் அன்பு, சிவபெருமானுக்குச் செய்யப்படும் பூஜைகளை விட மிக உயர்ந்த வழிபாடாகக் கருதப்படுகிறது.
5. பெண்களை அவமரியாதை செய்தல்
பெண்களை அவமரியாதை செய்வதை சிவபெருமான் ஏற்றுக்கொள்ள மாட்டார். பெண்களுக்கு மரியாதை இல்லாத இடத்தில் எந்தத் தெய்வமும் வாசம் செய்யாது என்பது ஐதீகம். சிவபெருமானை வழிபடுபவர்கள் பெண்களுக்கு மரியாதை கொடுக்க வேண்டும். பெண்கள் கேலி செய்வது, அவர்களைத் தரக்குறைவாகப் பேசுவது, நடத்துவது, அவர்கள் துன்பத்திற்கு ஆளாக்குவது ஆகியவை மன்னிக்க முடியாத குற்றங்களாகக் கருதப்படுகிறது.