பூரி ஜெகந்நாதர் கோவில்: காற்றின் திசைக்கு எதிராகப் பறக்கும் மர்மக் கொடி!

ஒடிசாவில் உள்ள பூரி ஜெகந்நாதர் கோவில் உலகப்புகழ் பெற்றது. பல அதிசயங்கள், ஆச்சரியங்கள், புரியாத புதிர்கள் நிறைந்த கோவில்களில் இதுவும் ஒன்று. இந்தக் கோவில் பற்றி பல கதைகள் சொல்லப்பட்டாலும், அறிவியலுக்கு இயற்கைக்கு சவால் விடும் பல ஆச்சரியங்களும் இங்கு உண்டு. அப்படி ஒரு விஷயம் தான் கோவிலின் உச்சியில் கட்டப்பட்டுள்ள கொடி, காற்றின் திசைக்கு எதிர் திசையில் பறப்பது.

பூரி ஜெகந்நாதர் கோவிலில் உள்ள கொடி காற்றின் திசைக்கு எதிராகப் பறப்பது பல ஆண்டுகளாக ஆச்சரியத்தை ஏற்படுத்தி வருகிறது. பல அறிஞர்கள் மற்றும் பக்தர்கள் இதற்கான காரணத்தை கண்டுபிடிக்க முயன்று வருகின்றனர். ஆனால், இதுவரை சரியான விளக்கம் கிடைக்கவில்லை. இது இயற்பியல் விந்தையா அல்லது தெய்வீக சக்தியா என்பது புரியாத புதிராகவே உள்ளது. கொடி காற்றின் திசைக்கு எதிராகப் பறப்பது, நம்பிக்கையின் சக்தியையும், கண்ணுக்கு தெரியாத தெய்வீகத்தின் ஆற்றலையும் காட்டுவதாக நம்பப்படுகிறது.

பதிதபவன்: புனிதக் கொடியின் மகத்துவம்

ஜெகந்நாதர் கோயிலின் கொடி "பதிதபவன்" என்று அழைக்கப்படுகிறது. இது தினமும் 200 அடி உயரமுள்ள கோபுரத்தின் மீது ஏற்றப்படுகிறது. தினமும் புதிய கொடி மாற்றப்படும் வழக்கமும் உள்ளது. இந்த கொடி வெறும் அலங்கார பொருள் அல்ல. இது மத மற்றும் கலாச்சார முக்கியத்துவத்தை கொண்டுள்ளது. கொடியில் ஜெகந்நாதரின் உருவம் பொறிக்கப்பட்டிருக்கும். இது தெய்வீக பிரசன்னம், பாதுகாப்பு மற்றும் ஆசீர்வாதத்தை குறிக்கிறது. இது அசைக்க முடியாத நம்பிக்கையின் அடையாளமாக விளங்குகிறது. மேலும், நம்மை விட உயர்ந்த சக்தி ஒன்று உள்ளது என்பதை தினமும் நினைவூட்டுகிறது.

பூரி ஜெகந்நாதர் கோவில் கொடி பற்றிய சுவாரஸ்யங்கள்

ஜெகந்நாதர் பூரி ஸ்ரீமந்திர் கோவிலின் மேல் அமைந்துள்ள கொடிக்கு பதிதபவனா பனா துவாரபாலா கொடி அல்லது நீலா சக்ரா கொடி என்று பெயர். காற்றின் திசைக்கு எதிராக கொடி பறக்க அறிவியல் காரணங்களும் உள்ளன. கோவிலின் கட்டமைப்பு மற்றும் கட்டிடக்கலை காரணமாக காற்று சுழன்று அடிக்கும் போது, கொடி எதிர் திசையில் பறக்கலாம் என்று சிலர் கருதுகின்றனர். இதை "wind tunnel effect" என்று கூறுகிறார்கள். இருப்பினும், இது அறிவியல் விளக்கமாக இருந்தாலும், கோவிலின் ஆன்மீக முக்கியத்துவத்தை குறைத்து மதிப்பிட முடியாது.

உள்ளூர் மக்கள் கொடி காற்றின் திசைக்கு எதிராக பறப்பது தெய்வீக சக்தியால் தான் என்று நம்புகிறார்கள். ஜெகந்நாதரின் ஆசீர்வாதத்தால் தான் கொடி அப்படி பறக்கிறது என்பது அவர்களின் நம்பிக்கை. பழங்கால கோவிலின் நம்பிக்கைகளின்படி, ஜெகந்நாதர் தான் கொடியை காற்றின் திசைக்கு எதிராக பறக்க வைக்கிறார். இது அவரது உயர்ந்த சக்தியின் நிரூபணமாகும். இந்த நம்பிக்கை, கோயிலின் புனித சடங்குகளுடன் நெருக்கமாக தொடர்புடையது. மேலும், இயற்கை கூட கடவுளின் விருப்பப்படி தான் நடக்கிறது என்பதை இது காட்டுவதாக பக்தர்கள் நம்புகிறார்கள்.

அறிவியல் ரீதியாகவும், ஆன்மிக ரீதியாகவும் பல காரணங்கள் சொல்லப்பட்டாலும், கொடி காற்றின் திசைக்கு எதிர் திசையில் பறப்பதன் உண்மையான காரணம் இதுவரை மர்மமாகவே உள்ளது. கடற்கரைக்கு அருகில் அமைந்திருந்தும் கோவிலின் உச்சியில் கட்டப்படும் கொடி திசை மாறி பறப்பது தான் பலருக்கும் புரியாத புதிராகவும் உள்ளது.