முருகப் பெருமானின் திருவருளைப் பெறவும், வாழ்வில் சகல துன்பங்களிலிருந்தும் விடுபடவும் வேல் வழிபாடு ஒரு சக்திவாய்ந்த வழி. வேலுண்டு வினையில்லை என்ற முதுமொழிக்கு ஏற்ப, முருகனின் வேல் பக்தர்களுக்கு வெற்றிகளையும் மன நிம்மதியையும் அள்ளித் தரும். இந்த சிறப்புமிக்க வேல் தோன்றிய வரலாறு, அதன் மகிமைகள், மற்றும் வீட்டில் வேல் வழிபடும் எளிய வழிமுறைகள் பற்றி விரிவாகக் காண்போம்.
வேல் மகிமையும் அதன் முக்கியத்துவமும்
செவ்வாய், வியாழன், சஷ்டி, கிருத்திகை ஆகிய தினங்களில் முருகனை மனதார வேண்டி வேலுக்கு பால் அபிஷேகம் செய்து வந்தால் எப்படிப்பட்ட துன்பமும் நீங்கி விடும். முருகனிடம் வேண்டிய வரங்கள் கிடைக்கும் என்பது பக்தர்களின் நம்பிக்கை. "சுக்குக்கு மிஞ்சிய மருந்தும் இல்லை! சுப்பிரமணிய சுவாமிக்கு மிஞ்சிய கடவுளும் இல்லை" என்றும் "வேலுண்டு வினையில்லை...மயிலுண்டு பயமில்லை, குகனுண்டு குறையில்லை...கந்தன் உண்டு கவலை இல்லை" என்றெல்லாம் பக்தர்கள் காலம் காலமாக கூறி வருகின்றனர். அனைத்து தெய்வங்களும் கையில் ஏதாவது ஒரு ஆயுதத்தை தாங்கி இருந்தாலும், அவைகள் தனியாக வணங்கப்படுவது கிடையாது. ஆனால் முருகப் பெருமான் கையில் இருக்கும் வேல் அப்படி கிடையாது. இது சிவசக்தியின் அம்சம் என்பதால், வேலை வணங்கினாலே சிவன், சக்தி, முருகன் ஆகிய மூவரையும் வணங்கிய பலன் கிடைக்கும்.
நம் வாழ்க்கையில் தினமும் ஏதேனும் ஒரு பிரச்சனைகளையும், அதனால் மனக்கவலைகளையும் சந்தித்துக் கொண்டேதான் இருக்கிறோம். இந்தப் பிரச்சனைகளும், கவலைகளும் தீர செவ்வாய்க்கிழமைகளில் முருகப்பெருமானை வணங்கினால் போதும். நம்முடைய வேண்டுதல்கள் உடனடியாக பலிக்க வேண்டும் என்றால், அதற்கேற்ற சிறப்பான பரிகாரங்கள் நம்முடைய ஜோதிட சாஸ்திரத்தில் சொல்லப்பட்டுள்ளது. முருகன் என்றாலே நம் நினைவிற்கு வருவது மயிலும், வேலும் தான். புராணங்களின் படி அதிக முக்கியத்துவம் வாய்ந்த மிக முக்கியமான ஆயுதமாக முருகனின் வேல் கருதப்படுகிறது. 'வேலுண்டு வினையில்லை. மயிலுண்டு பயமில்லை' என்பதே தொன்று தொட்டு சொல்லும் கூற்று. முருகனுக்கு இந்த வேலினால் வேல்முருகன் என்ற பெயரும் உண்டு.
வேல் தோன்றிய வரலாறு
சூரபத்மன் எனும் அரக்கனை அழிக்க சிவ பெருமான் வேலை உருவாக்கி, அதை சக்தியிடம் கொடுத்தார். தேவி பார்வதி தன்னுடைய சக்திகள் அனைத்தையும் திரட்டி அதை வேலுக்கு அளித்து, முருகனிடம் கொடுத்தாள். அதனை கொண்டு சூரனை வதைக்க சொன்னதாக புராணங்கள் கூறுகின்றன. பொதுவாக வேலை சக்திவேல் என்று தான் குறிப்பிடுவோம். ஆனால் முருகன் மட்டுமல்ல, அவர் கையில் இருக்கும் வேலும் சிவசக்தியின் அம்சமானதாகும். அதனால் சிவசக்தி வேல் என குறிப்பிடுவதே சரியான முறையாகும்.
முருகனின் வேலுக்கு அப்படி என்ன சிறப்பு?
'வெல்' என்ற வினைச்சொல்லே நீண்டு 'வேல்' என்ற பெயர்ச்சொல் ஆகிறது. ஆகவே, வேல் என்றால் வெற்றி என்று பொருள்படும். பராசக்தியின் வடிவமே வேலாயுதம் என்பார்கள். அறிவு, ஞானம், பொருள், இன்பம், திருவருள், திருவருட்சக்தி முதலிய சொற்கள் வேலின் உருவமாக உள்ள பராசக்தியையே குறிப்பனவாகும். முருகப்பெருமானுக்கே உரிய ஞானசக்தி வேலாயுதம். வெல்லும் தன்மையுடையது வேல். தன்னை மனதார வேண்டி, சரணடைபவர்களுக்கு நிச்சயம் வெற்றியைத் தருவதால், அதற்கு 'வெற்றிவேல்' என்ற பெயரும் உண்டு.
வேல், ஞானத்தின் வடிவமாகும். வேலின் அடிப்பகுதி ஆழமாகவும், இடைப்பகுதி விசாலமாகவும், நுனிப்பகுதி கூர்மையாகவும் திகழ்கிறது. அதே போல் நம்முடைய அறிவானது கூர்மையானதாகவும், அகன்றும், ஆழமாகவும் இருக்க வேண்டும் என்பதை இது உணர்த்துவதாக இருக்கிறது.
வேல் வழிபாடு வழிமுறைகள்
முருகன் வழிபாட்டில் தொன்மை வாய்ந்தது வேல் வழிபாடு. இன்றும் பல முருகன் ஆலயங்களில் வேலுக்கு மட்டுமே பூஜை செய்து கொண்டிருக்கின்றனர். மனம் பாரமாக இருக்கும் நேரங்களில் மனதுக்குள் சக்திவேலை நினைத்துக் கொண்டு 'ஓம் ஐம் ஹ்ரீம் வேல் காக்க' என்று சொன்னால் மனம் லேசாகி விடும்.
- பூஜை பொருட்கள்: வேல் வைத்திருப்பவர்கள் முறையாக பூஜைகள், அபிஷேகங்கள் செய்ய வேண்டும். பெரிய வேல் வாங்குவதை தவிர்க்கலாம்.
- உகந்த நாட்கள்: முருகனுக்கு உகந்த செவ்வாய்க்கிழமைகளில் வேல் வழிபாடு செய்வது மிகவும் நல்லது. மேலும் ஒவ்வொரு மாதம் வரும் கிருத்திகை, சஷ்டி திதிகளில் முருகனையும், முருகனுடைய வேலையும் வழிபாடு செய்தால் சகல சம்பத்துக்களும், சௌபாக்கியங்களும் உண்டாகும்.
- வேல் வாங்குதல்: பிரசித்தி பெற்ற முருகன் கோவில்களில் பஞ்சலோக வேல் விற்பனைக்கு இருக்கும். தங்கம், வெள்ளி, செம்பு, பித்தளை என்று எந்த உலோகத்திலும் வேல் வாங்கி வைத்துக் கொள்ளலாம். வாங்கும் பொழுது உங்கள் கைகளால் வாங்காமல் வயதில் மூத்தவர்களை வாங்கிக் கொடுக்கச் சொல்லி அவர்கள் கைகளால் நீங்கள் வாங்கிக் கொள்ளலாம்.
வீட்டில் வேலை வழிபடும் முறை:
- வேல் வழிபாடு செய்பவர்கள் பூஜையறையில் முருகன் படத்தின் முன்பு சிவப்பு பட்டு துணி விரித்து அதில் வெள்ளி அல்லது செம்பு பாத்திரத்தில் பச்சரிசி நிரப்பி வேலை அதில் சொருகி வைக்க வேண்டும். முடியாதவர்கள் சுத்தமான பசுஞ்சாண வியூதியை வாங்கி, அதற்கு மத்தியில் வேலை நிறுத்தி வைத்து வழிபட வேண்டும்.
- ஒவ்வொரு முறை வேல் பூஜை செய்யும் பொழுதும் காய்ச்சாத பசும் பால், பன்னீர் ஆகியவற்றைக் கொண்டு அபிஷேகம் செய்து பின்னர் சாதாரண தண்ணீர் கொண்டு சுத்தம் செய்து வைத்துக் கொள்ளலாம்.
- பின் வேல் விருத்தம் பாடலை பாடிக்கொண்டு பூஜை செய்வது இரட்டிப்பு பலன்களை கொடுக்கும். வேல் விருத்தம் முருகன் கையில் வைத்திருக்கும் வேலை பற்றி புகழ்ந்து பாடுவது ஆகும். அருணகிரிநாதர் அருளிய வேல் விருத்தம் முதல் தொகுப்பில் பத்து பாடல்கள் உள்ளன. இப்பாடலை பாடி வேலுக்கு மஞ்சள், குங்குமம், விபூதி அபிஷேகம் செய்து, அவல், பொரி, கற்கண்டு நைவேத்தியம் வைத்து முருக மந்திரங்களை உச்சரித்து நெய் தீபம் ஏற்றி வழிபாடு செய்வது சகல செல்வங்களையும் வாரி வழங்கக்கூடியதாக அமையும்.
வேலை வணங்குவதால் கிடைக்கும் பலன்கள்
- காரிய தடைகள் விலகி திருமணம் கைகூடும், குழந்தைப்பேறு கிடைக்கும்.
- வாழ்வில் ஏற்படும் தடைகள் நீங்கி, எடுத்த காரியங்கள் வெற்றியடையும்.
- கல்வியில் மேன்மை, மன பயம் நீங்கி வலிமை உண்டாகும்.
- வியாபாரத்தில் லாபம், பில்லி சூனியம், நவகிரகங்களினால் உண்டாகும் தோஷங்கள் நீங்கும்.
- சகல ஐஸ்வர்யங்களும் கிடைக்கும். மரண பயம் நீங்கி நீண்ட ஆயுள் பெறலாம்.
- சொந்த வீடு மற்றும் நினைத்த காரியம் நினைத்தப்படியே நிறைவேறும்.
- கடன் பிரச்சனைகள் நீங்கி செல்வம் பெருகும்.