நம் வீடுகளில் எறும்புகளைப் பார்ப்பது சகஜம். ஆனால், கருப்பு நிற எறும்புகள், குறிப்பாக 'பிள்ளையார் எறும்புகள்' என்று அழைக்கப்படுபவை, வெறும் பூச்சிகள் மட்டுமல்ல. அவை ஆன்மிக ரீதியாக சில முக்கிய அர்த்தங்களைக் கொண்டிருப்பதாக நம்பப்படுகிறது. விநாயகப் பெருமானின் அருளைப் போல சாந்த குணம் கொண்ட இந்த எறும்புகள், நம் வீட்டிற்குள் வந்தால் என்னென்ன நல்ல மாற்றங்கள் நிகழும் அல்லது எதைப் பற்றிய எச்சரிக்கை என்பதை இந்த விரிவான கட்டுரையில் காண்போம். ஜோதிடம் மற்றும் ஆன்மிகத்தின் பார்வையில் இந்த எறும்புகளின் வருகையின் முக்கியத்துவத்தை அறிவோம்.
பிள்ளையார் எறும்புகளின் தனித்துவம்
எறும்புகளில் பல வகைகள் இருந்தாலும், கருப்பு நிறத்தில் இருக்கும் எறும்பை மட்டுமே நாம் பிள்ளையார் எறும்பு என விநாயகப் பெருமானுடன் ஒப்பிட்டு கூறுகிறோம். பொதுவாக எறும்புகள் கடிக்கும் சுபாவம் கொண்டவை. ஆனால் இந்த கருப்பு எறும்புகள் யாரையும் கடிக்காது. யாருக்கும் தீங்கு விளைவிக்காமல், விநாயகப் பெருமானைப் போல் சாந்த குணம் கொண்டதாக இருப்பதால் இந்த எறும்புகளை பிள்ளையார் எறும்பு என மக்கள் அழைக்கும் பழக்கம் ஏற்பட்டது. அது மட்டுமல்ல விநாயருக்கு படைக்கும் இனிப்புகளை சாப்பிடுவதற்கு இந்த எறும்புகள் அதிகம் வருவதாலும் இவற்றை பிள்ளையாருடன் தொடர்புபடுத்தி சொல்கிறோம். இந்த பிள்ளையார் எறும்புகளை சாதாரணமாக வீட்டில் பார்க்க முடியாது. அப்படி இந்த கருப்பு எறும்புகள் வீட்டிற்குள் வருவதற்கு ஆன்மிக ரீதியாக சில காரணங்கள் இருப்பதாக நம்பப்படுகிறது.
வீட்டில் கருப்பு எறும்புகள் வந்தால் என்ன அர்த்தம்?
பொதுவாக குப்பைகள், அசுத்தமாக இருக்கும் இடங்களில் சிவப்பு நிற எறும்புகள் தான் கூட்டம் கூட்டமாக வரும். கருப்பு எறும்புகள் வராது. சுத்தமான இடங்கள், இனிப்புகள் இருக்கும் இடங்களில் வரும். அதுவும் அரிதாகத் தான் இருக்கும். உங்கள் வீட்டில் கருப்பு எறும்புகள், கட்டை எறும்புகள் திடீரென வருகிறது அல்லது கூட்டமாக வருகிறது என்றால் அது சுபமான விஷயமாகப் பார்க்கப்படுகிறது.
- அதிர்ஷ்டத்தின் அடையாளம்: பண வரவின் அம்சமாகப் பார்க்கப்படுகிறது.
- தெய்வீக சக்தி: தெய்வீக சக்தி உள்ள இடங்களில் தான் கருப்பு எறும்புகளின் நடமாட்டம் காணப்படும். கோவில்கள், பூஜை அறைகள் ஆகியவற்றில் கருப்பு எறும்புகள் இருப்பதை காண முடியும்.
- நல்ல செய்தி: உங்கள் வீட்டில் கருப்பு எறும்புகள் வருகிறது என்றால் உங்கள் வீட்டை தேடி நல்ல செய்தி வரப் போகிறது என்று அர்த்தம்.
- தெய்வீக இருப்பு: நீங்கள் எவ்வளவு தான் சுத்தம் செய்தாலும் அதற்கு பிறகும் மீண்டும் மீண்டும் கருப்பு எறும்புகள் வீட்டிற்குள் வருகிறது என்றால், உங்களை சுற்றியும், உங்கள் வீட்டிற்குள் தெய்வீக சக்தி நிறைந்து இருக்கிறது என்று அர்த்தம்.
- பூஜை ஏற்றல்: நீங்கள் சுவாமிக்கு நைவேத்தியமாக படைக்கும் உணவுப் பொருட்களை கருப்பு எறும்புகள் வந்து சாப்பிடுகிறது என்றால், உங்களின் பூஜையை கடவுள் ஏற்றுக் கொண்டதாக அர்த்தம். ஆனால் சாமிக்கு வைக்கும் பிரசாதத்தை கருப்பு எறும்புகள் எடுப்பது அனைத்து நேரங்களிலும் நடக்காது என்பதை கவனித்து பார்த்தால் புரியும்.
- செல்வ செழிப்பு: உங்கள் வீட்டிற்கு கருப்பு எறும்பு வெளியில் இருந்து உள்ளே வருவதையும், வீட்டிற்குள் வந்த எறும்பு சுவற்றின் மீது ஏறும் காட்சியை அடிக்கடி கண்டால் உங்கள் வீட்டை தேடி செல்வம் வரப் போகிறது. உங்களின் வாழ்க்கையில் வளர்ச்சி, முன்னேற்றம் ஏற்படப் போகிறது என்று அர்த்தம்.
அதே சமயம் கருப்பு எறும்புகள் வீட்டிற்குள் இருந்து வெளியில் சென்று கொண்டே இருந்தாலோ அல்லது சிவப்பு எறும்புகளின் நடமாட்டம் வீட்டிற்குள் அதிகம் காணப்பட்டாலோ அது அபசகுனமாக கருதப்படுகிறது. பிரச்சனைகள், துன்பங்கள் வரும் என்பதற்கான அறிகுறியாகும்.
ஆன்மிக உணர்வு மற்றும் நிம்மதி
திடீரென வீட்டிற்குள் வந்து, திடீரென காணாமல் போகும் இந்த கருப்பு எறும்புகளை தெய்வத்தின் அம்சமாகவே பலர் நம்புகிறார்கள். பிள்ளையார் எறும்புகளின் நடமாட்டம் வீட்டில் இருக்கும் போது வீட்டிலும், உங்கள் மனதிலும் ஒரு வித நிம்மதியை உங்களால் உணர முடியும். கடவுள் சம்பந்தமான கனவுகள் அடிக்கடி வரத் துவங்கும். மனதில் ஆன்மீக சிந்தனைகள் அதிகமாக இருப்பதை உணர முடியும். இதுவரை இதை நீங்கள் கவனித்தது கிடையாது என்றால், இனி கவனித்தால் உங்களுக்கே புரியும். இந்த நிகழ்வுகள் நம் வாழ்க்கையில் ஒரு நேர்மறை மாற்றத்தையும், ஆன்மீக விழிப்புணர்வையும் ஏற்படுத்தும்.