ஆசனவாய் அரிப்பு என்றதும் சிலருக்கு கேட்கவே அருவருப்பாகத் தோன்றலாம். ஆனால் பெரும்பாலும் எல்லோருமே ஒருமுறையாவது இந்த அசௌகரியத்தை சந்தித்து இருப்பார்கள். ஆனால் சிலருக்கு இது அடிக்கடி ஏற்படும். குறிப்பாக இந்த பிரச்சினையை இரவு நேரத்தில் தான் அதிகமாக சந்திக்கிறார்கள். இந்த பிரச்சினைக்கு ஆபத்தில்லாத காரணங்களும் இருக்கலாம். மிக தீவிர ஆபத்தான காரணங்களும் இருக்கலாம்.
ஆசனவாய் அரிப்பு ஏற்பட காரணங்கள்
- பாத்ரூம் சுகாதார பிரச்சினை - பொதுக்கழிப்பிடம் பயன்படுத்துதல்
- மூல நோய் அல்லது குதப் பிளவு பிரச்சினை
- ஆல்கஹால், காஃபைன் உள்ளிட்ட பானங்கள், வியர்வை, இரவில் எடுக்கும் சில மருந்துகள்
- அணியும் உள்ளாடைகள்
- குடல் புழுக்கள்
- அரிக்கும் தோல் அழற்சி பிரச்சினை
- மாதவிடாய் நாப்கின்கள்
- குழந்தைகளுக்கு டயப்பரால் ஏற்படும் அரிப்பு
இவற்றில் ஏதேனும் ஒன்று அல்லது அதற்கு மேற்பட்ட காரணங்களால் ஆசனவாய் பகுதியில் அரிப்பு ஏற்படலாம்.
இரவில் ஏற்படும் ஆசனவாய் அரிப்பை கட்டுப்படுத்தும் வீட்டு வைத்தியங்கள்
இரவில் அணியும் ஆடைகள்
இரவு நேரங்களில் சிலருக்கு உள்ளாடைகள் மட்டும் அணிந்து உறங்கும் பழக்கம் இருக்கும். சிலர் முழுமையாக ஆடைகள் அணிந்து கொண்டு தூங்குவார்கள். எப்படி இருந்தாலும் சரி, நீங்கள் அணியும் ஆடை நன்கு காற்று உள்ளே புகும்படி ப்ரீத்தபிள் மெட்டரியலாக இருக்கும்படி அணியுங்கள். முடிந்த வரையில் மெல்லிய காட்டன் ஆடைகளை அணிவது நல்லது.
மேற்பூச்சு க்ரீம்கள்
மெடிக்கல் ஷாப்களில் இதற்கான மேற்பூச்சு க்ரீம்கள் விற்கப்படுகின்றன. அவற்றை வாங்கி அப்ளை செய்து வரலாம். ஆனால் இந்த க்ரீம்கள் உங்களுக்கு எதனால் அரிப்பு ஏற்படுகிறது என்பதை பொருத்து தான் சரியான பலனைக் கொடுக்கும். அதனால் உங்களுக்கு அரிப்பு ஏற்படுவதற்கான காரணத்தைச் சொல்லி மருத்துவரிடம் ஆலோசனை பெற்று அதற்கு ஏற்ப க்ரீம்கள் வாங்கி பயன்படுத்துங்கள்.
குளிர்ச்சியாக வைத்திருங்கள்
இரவு நேரத்தில் படுக்கையறை குளிர்ச்சியாக இருக்கும்படி பார்த்துக் கொள்ளுங்கள். ஏனெனில் அதிகமாக வியர்க்கும் போதும் ஆசனவாய் அரிப்பு பிரச்சினை ஏற்படும். முடிந்தவரையில் காற்றோட்டமாக வைத்திருங்கள். அதேபோல உடலில் சூடு அதிகரிக்காமல் இருக்கும் மெத்தை விரிப்புகளைப் பயன்படுத்துங்கள்.
ஈரமாக இல்லாமல் இருத்தல்
குளித்த பிறகும் சரி, கழிவறையைப் பயன்படுத்திய பிறகும் சரி, சுத்தம் செய்த பிறகு உடலை அப்படியே ஈரமாக விட்டுவிடுவதும் தவறு. ஆனால் நிறைய பேர் உடலை டவல் வைத்து துடைப்பார்கள். அந்தரங்கப் பகுதிகளை அப்படியே கண்டு கொள்ளாமல் விட்டு விடுவார்கள். அந்தரங்க பகுதி, ஆசனவாய் என எல்லா பகுதிகளையும் ஈரமில்லாத துண்டு கொண்டு துடைக்க வேண்டும்.
இறுதியாக, மேலே குறிப்பிட்ட இந்த எளிமையான வீட்டு வைத்தியங்களைப் பின்பற்றுங்கள். உங்களுக்கு ஆசனவாய் அரிப்பு பிரச்சினை இருந்தால் சரியாகும். இருந்தாலும் இல்லையென்றால் இந்த சுகாதார நடவடிக்கைகளை பின்பற்றுதல் அவசியம்.