கோயிலில் தேங்காய் உடைப்பதன் சகுன விளக்கம்: நல்லதா? கெட்டதா?

தேங்காய் உடைப்பதன் ஆன்மிகத் தத்துவம் மற்றும் சகுனங்கள்

நாம் சாமி கும்பிட வாங்கும் அர்ச்சனை தட்டில் உள்ள கற்பூரம், வெற்றிலைப் பாக்கு, வாழைப்பழம் முதலியவற்றை வெளியில் இருந்து பார்த்து வாங்குவோம். ஆனால், தேங்காயை உடைத்தால் தான் அது முற்றியதா, இளம் தேங்காயா, அல்லது அழுகியிருக்கிறதா என்பதைக் கண்டறிய முடியும். தேங்காய் உடைப்பதன் பின்னணியில் பல ஆன்மிக விளக்கங்களும் ஜோதிட ரீதியான சகுன பலன்களும் உள்ளன.

1. தேங்காயில் பூ இருப்பது: சுப சகுனம்

இறைவனுக்கு உடைக்கும் தேங்காயில் பூ இருப்பது சாஸ்திரப்படி மிகவும் நல்ல சகுனமாகப் பார்க்கப்படுகிறது. மனதில் நினைத்த காரியங்கள் நிச்சயமாக முடியும் என்பதோடு, எதிர்பாராத வகையில் பண வரவு, மகிழ்ச்சியான செய்தி, நல்ல நிகழ்வுகள் நடக்க இருப்பதையும் இது உணர்த்துகிறது. குடும்பத்தில் சுப காரியங்கள், திருமணங்கள் அல்லது குழந்தைப்பேறு போன்ற நல்ல நிகழ்வுகள் நடக்க இருப்பதற்கும் தேங்காய்ப்பூ ஒரு நல்ல அறிகுறியாகும். இது முருகப்பெருமானின் அருளைப் பெற்றதற்குச் சமம்.

2. தேங்காய் முழு கொப்பரையாக இருப்பது: நல்ல பலன்கள்

பகவானுக்கு உடைக்கும் தேங்காய் முழு கொப்பரையாக இருந்தால், குழந்தைப் பேறுக்காகக் காத்திருப்பவர்களுக்குக் குழந்தைப் பேறு கிடைக்கும். மேலும், வீட்டில் சுப காரியங்கள் நடக்கும் என்றும் கூறப்படுகிறது. சண்டை சச்சரவுகள் நீங்கி, பிரிந்திருக்கும் குடும்ப உறுப்பினர்கள் அல்லது உறவினர்கள் ஒன்று சேர்வதோடு மகிழ்ச்சி நிலவும் என்றும் சாஸ்திரப்படி இது ஒரு சிறந்த சகுனம்.

3. தேங்காய் அழுகியிருப்பது: அச்சம் தேவையில்லை

கோயிலில் உடைக்கும் தேங்காய் அழுகி இருந்தால் பொதுவாக அபசகுனமாகப் பார்க்கப்படுகிறது. இதனால் பலர் மன வருத்தமும், கெட்டது நடந்துவிடுமோ என்ற பயமும் கொள்வார்கள். ஆனால், உண்மையில் ஆன்மிக விளக்கங்களின்படி, தேங்காய் அழுகி இருப்பது உங்கள் குடும்பத்தைப் பிடித்திருந்த துர்சக்திகள், பீடைகள், கண் திருஷ்டிகள் நீங்கிவிட்டதைக் குறிக்கும் மிக நல்ல சகுனமாகக் கருதப்படுகிறது. நாம் எண்ணிய காரியம் நிச்சயம் நிறைவேறும் என்பதுதான் இதற்கான பொருள். தூக்கத்தில் அடிக்கடி கெட்ட கனவுகள் வருவது, உடல்நிலை சரியில்லாமல் போவது போன்ற பிரச்னைகள் தேங்காய் உடைக்கும்போது அழுகி இருந்தால் தீர்ந்துவிடும். ஆகவே, கோயிலில் இறைவனுக்கு தேங்காய் உடைக்கும்போது அழுகி இருந்தால் பதற்றப்படவோ, மனம் சஞ்சலப்படவோ தேவையில்லை. இது நல்ல சகுனத்திற்கான அறிகுறி என்பதுதான் ஆன்மிக அறிஞர்களின் கூற்று.

தேங்காய் உடைப்பதன் தத்துவம்

தேங்காயில் உள்ள மூன்று கண்கள் மனிதனின் மும்மலங்களாகிய மாயை, ஆணவம், கன்மம் ஆகியவற்றை குறிப்பதால், இதை இறைவனுக்கு முன்பாக உடைக்கும் பொழுது என்னுடைய மும்மலங்களையும் உன் முன் உடைகிறேன் என்பதுதான் தேங்காய் உடைப்பதற்குப் பின்னால் இருக்கும் தார்ப்பரியம் ஆகும். ஒரு பக்தன் தனது அகந்தையை இறைவனுக்கு முன்பாக சமர்ப்பிக்கிறான் என்பது தான் தேங்காய் உடைப்பதன் தத்துவம். சாஸ்திரங்கள் என்பது மனிதனைப் பக்குவப்படுத்தி, நல்வழிப்படுத்துவதற்காக ஏற்படுத்தப்பட்டதே தவிர, பயமுறுத்தி மூட நம்பிக்கைகளை விதைப்பதற்காக ஏற்படுத்தப்பட்டது கிடையாது. ஆகவே, தேங்காய் உடைக்கும்போது அழுகி இருந்தால் அபசகுனம் என்று கருதாமல், அதற்கு மாற்றாக இன்னொரு நல்ல தேங்காயை வாங்கி, மனதில் இறைவனை நினைத்து மீண்டும் உடைத்து இறைவனுக்கு சமர்ப்பிக்கலாம்.