மகாளய பட்சம் என்பது நம்முடைய முன்னோர்களுக்கு திதி, தர்ப்பணம் அளித்து அவர்களின் ஆசிகளைப் பெறும் ஒரு புனிதமான 15 நாள் காலமாகும். பித்ரு தோஷங்களைப் போக்கி, குடும்பத்தில் சுபிட்சத்தை வழங்கும் இந்த மகத்துவமான காலத்தைப் பற்றிய முழுமையான வழிகாட்டியை இங்கு காணலாம்.
மகாளய பட்சம் என்றால் என்ன?
பட்சம் என்றால் 15 நாட்கள் கொண்ட ஒரு கால அளவு ஆகும். அதாவது பிரதமை திதி துவங்கி, அமாவாசை வரையிலான 15 நாட்களை குறிப்பதாகும். பட்சம் என்ற சொல்லுக்கு கூட்டமாக வருதல் அல்லது ஒன்று சேர்ந்து வருதல் என்ற பொருளும் உண்டு. இந்த கால கட்டத்தில் தான் பித்ருலோகத்தில் இருக்கும் நம்முடைய முன்னோர்கள் பித்ருலோகத்தில் இருந்து பூமிக்கு வருவதாக ஐதீகம். மகாளய பட்சத்தின் 15 நாட்களும் முன்னோர்களுக்கு திதி, தர்ப்பணம், சிரார்த்தம் செய்து வழிபடுவதற்கும், முன்னோரின் பெயரால் தானம் செய்து வழிபடுவதற்கும் ஏற்ற சிறப்பான காலமாக நம்பப்படுகிறது.
வழக்கமாக அமாவாசைகளில் நாம் யாருடைய பெயரை சொல்லி தர்ப்பணம் கொடுக்கிறோமோ அது அவர்களை மட்டுமே போய் சேரும். ஆனால் மகாளய பட்சத்தில் நாம் அளிக்கும் தர்ப்பணம், நம்முடைய முன்னோர்கள் அனைவரையும் சென்று சேரும் என சொல்லப்படுகிறது. அதே போல் இந்த காலகட்டத்தில் அளிக்கப்படும் தானங்களை நம்முடைய முன்னோர்களே நேரடியாக வந்து ஏற்று, நமக்கு ஆசி வழங்குவதாகவும் ஐதீகம். அதனால் தான் மகாளய பட்சம் மிகவும் முக்கியமான காலமாக குறிப்பிடப்படுகிறது.
இந்த 15 நாட்களும் நாம் செய்யும் வழிபாடுகளால் பித்ரு தோஷத்தில் இருந்து மீண்டும், முன்னோர்களின் ஆசிகளை முழுவதுமாக பெற முடியும். ஜோதிட ரீதியாகவும் முன்னோர் சாபங்கள் நீங்க இது மிகச் சிறந்த காலகட்டமாகும்.
மகாளய பட்சத்தின் முக்கியத்துவம்
மகாளய பட்சம் என்பது புரட்டாசி மாத அமாவாசைக்கு முந்தைய 15 நாட்களை குறிப்பதாகும். இந்த நாட்களில் செய்யப்படும் முன்னோர் வழிபாடு குடும்பத்தில் ஏற்படும் துன்பங்கள், சுப காரிய தடைகள், பொருளாதார இழப்புகள் ஆகியவற்றை போக்கி, சுபிட்சத்தை உண்டாக்கும். மகாளய பட்சத்தில் மட்டும் தெரியாதவர்களுக்கும், இறந்து போன அனைத்து உயிர்களுக்கும் தர்ப்பணம் கொடுக்கலாம். ஒரு வருடத்தில் வரக் கூடிய மிக முக்கியமான அமாவாசைகளில் மகாளய அமாவாசையும் ஒன்று.
இந்த ஆண்டு செப்டம்பர் 08ம் தேதி திங்கட்கிழமை மகாளய பட்சம் ஆரம்பமாகிறது. செப்டம்பர் 21ம் தேதி ஞாயிற்றுக்கிழமை மகாளய அமாவாசை வருகிறது. திங்கட்கிழமை என்பது சந்திரனுக்குரிய நாள். சந்திரன், தாய் வழி உறவுகளுக்கான கிரகம் ஆகும். அதே போல் ஞாயிற்றுக் கிழமைக்கு அதிபதியான சூரியன் தந்தை வழி உறவுகளுக்கு காரணமான கிரகம் ஆவார். அதனால் இந்த ஆண்டு மகாளய பட்சத்தில் விரதம் இருந்து முன்னோர்களை வழிபடுவதும், முன்னோர்களுக்குரிய தர்ப்பணம் போன்றவற்றை கொடுப்பதும் தாய் மற்றும் தந்தை வழி முன்னோர்களால் ஏற்பட்ட சாபங்கள், தோஷங்கள் ஆகியவற்றை நீக்க உதவும்.
மகாளய பட்சத்தில் செய்ய வேண்டியவை
- பசு மாட்டிற்கு அகத்திக்கீரை கொடுப்பது: இது புண்ணியத்தை சேர்க்கும் ஒரு முக்கியமான செயலாகும்.
- நாய்கள், காகங்களுக்கு உணவளிப்பது: பித்ருக்களின் அம்சமாக கருதப்படும் காகங்களுக்கு உணவிடுவதன் மூலம் முன்னோர் ஆசி கிடைக்கும்.
- ஏழைகள் மற்றும் முதியவர்களுக்கு உணவளிப்பது: இவர்களுக்கு தேவையான உதவிகளை செய்வது மிகப் பெரிய புண்ணியத்தை சேர்க்கும்.
- தினமும் தர்ப்பணம் அளிப்பது: மகாளய பட்சத்தின் 15 நாட்களுமே முன்னோர்களுக்கு தர்ப்பணம் அளிக்கலாம். ஒரு வருடத்தில் கொடுக்க வேண்டிய 96 தர்ப்பணங்களில் மகாளய பட்சத்தின் 15 நாட்களும் கொடுக்கும் தர்ப்பணமும் அடங்கும்.
- வீட்டில் விளக்கேற்றி வழிபடுவது: தை மற்றும் ஆடி மாத அமாவாசைகளை போல் புரட்டாசி மாதத்தில் வரும் மகாளய அமாவாசையிலும், அதற்கு முந்தைய 15 நாட்களும் முன்னோர்களுக்காக வீட்டில் தினமும் விளக்கேற்றி வைத்து வழிபடுவது நல்லது.