மோக்ஷதா ஏகாதசி 2025: முக்கியத்துவம், பலன்கள் மற்றும் விரத முறை

மன்னர் வைகானசா மற்றும் பர்வத முனிவர் கதை

சம்பகா என்ற நகரத்தில் வசித்த மன்னர் வைகானசா, தன் பிரஜைகளிடம் மிக அன்பாக இருந்தார். ஒருநாள் அவர் ஒரு கனவு கண்டார். அதில் தன் தந்தை நரகத்தில் விழுந்து பற்பல இன்னல்களுக்கு ஆளாகியிருப்பதைக் கண்டார். இதனைக் கண்டவுடன் மன்னர் ஆச்சர்யத்தில் திகைத்தார். மறுநாள் கற்றறிந்த அந்தணர்களின் சபையில் மன்னர் தன் கனவில் கண்டதை வெளிப்படுத்தினார். நரகத்திலிருந்து தன்னை விடுவிக்குமாறு தன் தந்தை தன்னிடம் வேண்டியதையும் மன்னர் எடுத்துரைத்தார். கனவு கண்ட நாளில் இருந்து மன்னர் நிம்மதியற்றிருந்தார்.

தந்தையை நரகத்தின் பிடியில் இருந்து விடுவிப்பதற்கான வழி முறையைக் கூறுமாறு அந்தணர்களிடம் வேண்டினார். அந்தணர்கள், பர்வத முனிவரின் ஆசிரமம் அருகிலேயே உள்ளதாகவும், அவர் கடந்த காலம், நிகழ்காலம் மற்றும் வருங்காலத்தையும் அறிந்தவர் என்றும், அவரிடம் ஆலோசனை கேட்குமாறும் கூறினர். ஆலோசனையைக் கேட்ட மன்னர் வைகானசா, அந்தணர்கள் மற்றும் தன் சகாக்களுடன் பர்வத முனிவரின் ஆசிரமத்திற்குச் சென்றார்.

முனிவரிடம் தன் கனவையும், அதனால் ஏற்பட்ட துயரத்தையும் விவரித்தார். மன்னரிடம் நிகழ்ந்தவை அனைத்தையும் கேட்ட பர்வத முனிவர் ஆழ்ந்த தியானத்தில் அமர்ந்தார். சிறிது நேரத்திற்கு பிறகு முனிவர் தியானத்தில் இருந்து வெளியேறி மன்னரிடம் கூறினார்: "எனதருமை மன்னா, உன் தந்தை தன் முற்பிறவியில் அதிகமாக காம இச்சை கொண்டிருந்ததால் அவரே தன்னை இந்த நிலைக்கு தாழ்த்திக் கொண்டார். இப்பொழுது நீங்கள் அனைவரும் கார்த்திகை மாத வளர்பிறையில் தோன்றக் கூடிய ஏகாதசி விரதத்தை அனுஷ்டித்தால் அதன் பலனால் உன் தந்தை நரக வாழ்க்கையின் பிடியில் இருந்து விடுபடுவார்."