சபரிமலை ஐயப்ப பக்தர்களுக்கான கேரள அரசின் முக்கிய அறிவுரைகள்

கேரள அரசின் முக்கிய எச்சரிக்கை மற்றும் சுகாதார குறிப்புகள்

சபரிமலையில் பக்தர்கள் கூட்டம் அலைமோதியதால், முதல் நாளிலேயே 1.36 லட்சம் பக்தர்கள் தரிசனம் செய்துள்ளனர். கார்த்திகை முதல் நாள் என்பதால் ஏறக்குறைய 6 மணி நேரம் வரிசையில் காத்திருந்து ஐயப்பனை தரிசித்துள்ளனர். இந்த சூழ்நிலையில், கேரளாவில் மூளைக் காய்ச்சலை ஏற்படுத்தக் கூடிய அமீபிக் மெனிங்கோஎன்செபாலிடிஸ் (amoebic meningoencephalitis) அதிகமாக பரவி வருவதால், கோயிலுக்கு வரும் பக்தர்கள் முன்னெச்சரிக்கையுடன் இருக்கும்படி அறிவுறுத்தப்பட்டுள்ளது.

குறிப்பாக, சபரிமலை வரும் ஐயப்ப பக்தர்கள் ஆறுகளில் புனித நீராடும் போது, தங்கள் மூக்கில் தண்ணீர் புகாமல் பார்த்துக் கொள்ள வேண்டும் என வலியுறுத்தப்பட்டுள்ளது. இது போன்ற நோய்த்தொற்றுகளில் இருந்து பாதுகாத்துக் கொள்வது மிகவும் அவசியம்.

மேலும், வேறு காரணத்திற்காக ஏற்கனவே சிகிச்சை எடுத்துக் கொள்பவர்கள் தங்கள் மருத்துவ பதிவுகள் மற்றும் வழக்கமான மருந்துகளை அவசியம் உடன் எடுத்துச் செல்ல அறிவுறுத்தப்படுகிறார்கள். யாத்திரையின் போது அவ்வப்போது தங்களின் உடல்நிலையை பரிசோதித்துக் கொள்ளும் படி கேட்டுக் கொள்ளப்பட்டுள்ளது. பக்தர்கள் நடைபாதையிலும் மலையிலும் மெதுவாக நடந்து செல்ல வேண்டும். சோர்வாக உணர்ந்தால் அவ்வப்போது ஓய்வெடுக்க வேண்டும். சோர்வு, நெஞ்சு வலி போன்ற ஏதேனும் அசௌகரியம் ஏற்பட்டால், அருகிலுள்ள மருத்துவ மையத்தை அணுகுமாறு அறிவுறுத்தப்படுகிறார்கள்.

ஏதேனும் அவசரநிலை ஏற்பட்டால், பக்தர்கள் உதவிக்கு 04735 203232 என்ற எண்ணை அழைக்கலாம் என கேரள சுகாதார அமைச்சர் வீணா ஜார்ஜ் தெரிவித்தார்.

யாத்திரிகர்களுக்கான வசதிகள்

பம்பாவிலிருந்து சன்னிதானம் செல்லும் வழியில் ஆம்புலன்ஸ்கள் மற்றும் மருத்துவ மையங்கள் ஏற்பாடு செய்யப்பட்டுள்ளன. பம்பாவில் ஒரு கட்டுப்பாட்டு அறை அமைக்கப்பட்டுள்ளது. பத்தனம்திட்டாவில் அவசர இருதய சிகிச்சை சேவைகள் மற்றும் ஒரு கேத் லேப் திறக்கப்பட்டுள்ளன. யாத்ரீகர்களுக்கு தகவல் தெரிவிக்கவும், சுமூகமான பயணத்திற்காகவும், புனித யாத்திரைப் பாதை முழுவதும் தெலுங்கு, ஆங்கிலம், இந்தி, தமிழ் மற்றும் கன்னடம் ஆகிய மொழிகளில் பலகைகள் வைக்கப்பட்டுள்ளன.

அடிக்கடி கேட்கப்படும் கேள்விகள்